jise kal raat bhar puja gaya tha

jise kal raat bhar puujā gayā thā

vo but kyuuñ sub.h ko TuuTā huā thā

agar sach kī haqīqat ab khulī hai

to jo ab tak nazar aayā thā kyā thā

agar ye talḳhiyoñ kī ibtidā hai

to ab tak kaun sā amrit piyā thā

khulā hai mujh pe ab duniyā kā matlab

magar ye raaz pahle bhī khulā thā

maiñ jis meñ huuñ ye duniyā muḳhtalif hai

jahāñ maiñ thā vo aalam dūsrā thā

maiñ ḳhud ko maar kar pahuñchā yahāñ tak

to yaad aayā ki maiñ to mar chukā thā

mirī maiñ aur tirī maiñ donoñ hārīñ

maiñ banda huuñ magar tū to ḳhudā thā

maiñ ab jo muñh chhupā.e phir rahā huuñ

to kyā maiñ vāqa.ī chehra-numā thā

jise kal raat bhar puja gaya tha

wo but kyun subh ko TuTa hua tha

agar sach ki haqiqat ab khuli hai

to jo ab tak nazar aaya tha kya tha

agar ye talKHiyon ki ibtida hai

to ab tak kaun sa amrit piya tha

khula hai mujh pe ab duniya ka matlab

magar ye raaz pahle bhi khula tha

main jis mein hun ye duniya muKHtalif hai

jahan main tha wo aalam dusra tha

main KHud ko mar kar pahuncha yahan tak

to yaad aaya ki main to mar chuka tha

meri main aur teri main donon haarin

main banda hun magar tu to KHuda tha

main ab jo munh chhupae phir raha hun

to kya main waqai chehra-numa tha