jise KHud se juda rakkha nahin hai

jise ḳhud se judā rakkhā nahīñ hai

vo merā hai magar merā nahīñ hai

jise khone kā mujh ko Dar hai itnā

use maiñ ne abhī paayā nahīñ hai

nuqūsh ab zehn se miTne lage haiñ

bahut din se use dekhā nahīñ hai

sunā hai phuul ab khilte nahīñ haiñ

to kyā khul kar vo ab hañstā nahīñ hai

nagar chhoḌā hai jab se us ġhazal ne

koī shā.ir ġhazal kahtā nahīñ hai

tirī yādoñ se raushan hai mirā dil

ye vo sūraj hai jo Dhaltā nahīñ hai

mirī āñkhoñ kā ye dariyā ajab hai

ki bahtā hai to phir thamtā nahīñ hai

ḳhushī kā ho koī yā ġham kā lamha

guzar jaatā hai kyoñ ruktā nahīñ hai

'sabīh'-o-ḳhūb-rū chehre ka.ī haiñ

magar koī bhī us jaisā nahīñ hai

jise KHud se juda rakkha nahin hai

wo mera hai magar mera nahin hai

jise khone ka mujh ko Dar hai itna

use main ne abhi paya nahin hai

nuqush ab zehn se miTne lage hain

bahut din se use dekha nahin hai

suna hai phul ab khilte nahin hain

to kya khul kar wo ab hansta nahin hai

nagar chhoDa hai jab se us ghazal ne

koi shair ghazal kahta nahin hai

teri yaadon se raushan hai mera dil

ye wo suraj hai jo Dhalta nahin hai

meri aankhon ka ye dariya ajab hai

ki bahta hai to phir thamta nahin hai

KHushi ka ho koi ya gham ka lamha

guzar jata hai kyon rukta nahin hai

'sabih'-o-KHub-ru chehre kai hain

magar koi bhi us jaisa nahin hai