jise na hijr ne mara azab kya jaane

jise na hijr ne maarā 'azāb kyā jaane

jo muztarib na ho vo iztirāb kyā jaane

tajallī-e-ruḳh-e-mahtāb par hai apnī nazar

zamāna dāġh-e-dil-e-māhtāb kyā jaane

ye lāzmī hai ki sīkhe vo chashm-e-tar se mirī

tarīq-e-āb-fishānī sahāb kyā jaane

'alam se teġh se hai vāsta mujāhid ko

vo tabl-o-barbat-o-chang-o-rabāb kyā jaane

judā ho aab se jab ho ḳhabar tujhe maahī

darūn-e-bahr hai to pech-o-tāb kyā jaane

ḳhabar fanā kī jo hotī na sat.h par aatā

numūd-e-ḳhud kā natīja hubāb kyā jaane

galīm-e-kohna hai jhuggī hai rūkhī-sūkhī hai

faqīr-e-gosha-nashīñ ro’b-o-dāb kyā jaane

ḳhudā-e-pāk hidāyat na de use jab tak

vo rū-siyāh sirāt-e-savāb kyā jaane

ho tūl-e-umr to hotā hai tajraba vāfar

jo kuchh hai shaiḳh ko mā'lūm shaab kyā jaane

raheñge bheḌiye bheḌoñ kī khaal meñ kab tak

jhalak paḌegī haqīqat naqāb kyā jaane

hijāb-e-ġhaib meñ kyā hai kisī ko kyā mā'lūm

koī ba-parda nihāñ inqalāb kyā jaane

tumhāre naaz na apnī nazīr rakhte haiñ

tumhārī shoḳh-mizājī javāb kyā jaane

barāh-e-rāst pahuñchtī hai arsh-e-ā’lā tak

fuġhān-e-zulm-rasīda hijāb kyā jaane

paḌe na jis kī nazar husn-e-she’r par mere

vo kor-chashm hai motī kī aab kyā jaane

judā hai raah kisī kī kisī se ai 'bartar'

janāb-e-shaiḳh kī rind-e-ḳharāb kyā jaane

jise na hijr ne mara 'azab kya jaane

jo muztarib na ho wo iztirab kya jaane

tajalli-e-ruKH-e-mahtab par hai apni nazar

zamana dagh-e-dil-e-mahtab kya jaane

ye lazmi hai ki sikhe wo chashm-e-tar se meri

tariq-e-ab-fishani sahab kya jaane

'alam se tegh se hai wasta mujahid ko

wo tabl-o-barbat-o-chang-o-rabab kya jaane

juda ho aab se jab ho KHabar tujhe mahi

darun-e-bahr hai to pech-o-tab kya jaane

KHabar fana ki jo hoti na sath par aata

numud-e-KHud ka natija hubab kya jaane

galim-e-kohna hai jhuggi hai rukhi-sukhi hai

faqir-e-gosha-nashin ro’b-o-dab kya jaane

KHuda-e-pak hidayat na de use jab tak

wo ru-siyah siraat-e-sawab kya jaane

ho tul-e-umr to hota hai tajraba wafar

jo kuchh hai shaiKH ko ma'lum shab kya jaane

rahenge bheDiye bheDon ki khaal mein kab tak

jhalak paDegi haqiqat naqab kya jaane

hijab-e-ghaib mein kya hai kisi ko kya ma'lum

koi ba-parda nihan inqalab kya jaane

tumhaare naz na apni nazir rakhte hain

tumhaari shoKH-mizaji jawab kya jaane

barah-e-rast pahunchti hai arsh-e-a’la tak

fughan-e-zulm-rasida hijab kya jaane

paDe na jis ki nazar husn-e-she’r par mere

wo kor-chashm hai moti ki aab kya jaane

juda hai rah kisi ki kisi se ai 'bartar'

janab-e-shaiKH ki rind-e-KHarab kya jaane