jism ke KHol se niklun to qaza ko dekhun

jism ke ḳhol se niklūñ to qazā ko dekhūñ

but ko raste se haTā.ūñ to ḳhudā ko dekhūñ

aisā kyā jurm huā hai ki taḌapte marte

apne ehsās kī suulī pe anā ko dekhūñ

boltī aañkh kā ras hañste hue lafz kā ruup

baat nazroñ kī sunūñ yā ki sadā ko dekhūñ

in kī qismat ki khileñ roz tamannā ke gulāb

merī taqdīr ki zaḳhmoñ kī chitā ko dekhūñ

is tavaqqo' pe ki shāyad koī darvesh mile

ġhaur se shahr ke ek ek gadā ko dekhūñ

mujh ko tahzīb ke maktab ne sikhāyā hai yahī

taḳhtī-e-dil na paḌhūñ rañg-e-qabā ko dekhūñ

jism ke KHol se niklun to qaza ko dekhun

but ko raste se haTaun to KHuda ko dekhun

aisa kya jurm hua hai ki taDapte marte

apne ehsas ki suli pe ana ko dekhun

bolti aankh ka ras hanste hue lafz ka rup

baat nazron ki sunun ya ki sada ko dekhun

in ki qismat ki khilen roz tamanna ke gulab

meri taqdir ki zaKHmon ki chita ko dekhun

is tawaqqo' pe ki shayad koi darwesh mile

ghaur se shahr ke ek ek gada ko dekhun

mujh ko tahzib ke maktab ne sikhaya hai yahi

taKHti-e-dil na paDhun rang-e-qaba ko dekhun