jism ki aanch nahin shoala-e-ruKHsar nahin

jism kī aañch nahīñ sho.ala-e-ruḳhsār nahīñ

husn kī ab vo kahīñ garmī-e-bāzār nahīñ

kaun sī ruuh pe bār-e-ġham-e-afkār nahīñ

kaun sā sar hai ki jis par koī talvār nahīñ

pheñk do mujh ko dahakte hue sūraj kī tarah

merī qismat meñ agar sāya-e-dīvār nahīñ

un ke pairoñ ke tale phuul bichhā.e jaa.eñ

aur maiñ lams-e-nazar kā bhī to haqdār nahīñ

kyoñ musir ho ki ġhalat baat kī tā.īd karūñ

maiñ to is jurm pe apnā bhī taraf-dār nahīñ

kis liye haiñ ye sazā aur jazā ke charche

jab tujhe merī haqīqat se bhī inkār nahīñ

paañv Thokar ko taraste haiñ ki tā-hadd-e-nazar

rāste meñ koī patthar nahīñ dīvār nahīñ

jab ye chaltī hai to dil kaaT diyā kartī hai

ham ne maanā ki zabāñ hai koī talvār nahīñ

mujh meñ dilchaspī ke asbāb na DhūñDo yaaro

ik haqīqat huuñ maiñ afsāne kā kirdār nahīñ

mujh ko tārīḳh meñ mahfūz kiyā jā.egā

maiñ sahīfa huuñ koī roz kā aḳhbār nahīñ

maiñ pareshāñ huuñ bhikārī to nahīñ huuñ logo

kyoñ koī aañkh milāne kā ravādār nahīñ

haq-ba-jānib ho jo hañste ho mirā ġham sun kar

mujh meñ be-shak ye kamī hai maiñ adākār nahīñ

ab tire jaur kā sūraj hai sivā neze par

zer-e-dīvār bhī ab sāya-e-dīvār nahīñ

tujh pe ā.eñge har ik samt se patthar 'shā.ir'

kūcha-e-yār hai ye misr kā bāzār nahīñ

jism ki aanch nahin shoala-e-ruKHsar nahin

husn ki ab wo kahin garmi-e-bazar nahin

kaun si ruh pe bar-e-gham-e-afkar nahin

kaun sa sar hai ki jis par koi talwar nahin

phenk do mujh ko dahakte hue suraj ki tarah

meri qismat mein agar saya-e-diwar nahin

un ke pairon ke tale phul bichhae jaen

aur main lams-e-nazar ka bhi to haqdar nahin

kyon musir ho ki ghalat baat ki taid karun

main to is jurm pe apna bhi taraf-dar nahin

kis liye hain ye saza aur jaza ke charche

jab tujhe meri haqiqat se bhi inkar nahin

panw Thokar ko taraste hain ki ta-hadd-e-nazar

raste mein koi patthar nahin diwar nahin

jab ye chalti hai to dil kaT diya karti hai

hum ne mana ki zaban hai koi talwar nahin

mujh mein dilchaspi ke asbab na DhunDo yaro

ek haqiqat hun main afsane ka kirdar nahin

mujh ko tariKH mein mahfuz kiya jaega

main sahifa hun koi roz ka aKHbar nahin

main pareshan hun bhikari to nahin hun logo

kyon koi aankh milane ka rawadar nahin

haq-ba-jaanib ho jo hanste ho mera gham sun kar

mujh mein be-shak ye kami hai main adakar nahin

ab tere jaur ka suraj hai siwa neze par

zer-e-diwar bhi ab saya-e-diwar nahin

tujh pe aaenge har ek samt se patthar 'shair'

kucha-e-yar hai ye misr ka bazar nahin