jism-o-jaan ki basti mein silsile nahin milte

jism-o-jāñ kī bastī meñ silsile nahīñ milte

ab kisī bhī markaz se dā.ere nahīñ milte

do-qadam bichhaḌne se qāfile nahīñ milte

manzileñ to miltī haiñ rāste nahīñ milte

bārhā tarāshā hai ham ne aap kā chehra

aap ko na jaane kyuuñ aa.ine nahīñ milte

vaqt kī kamī kah kar jehl ko chhupāte haiñ

āj-kal kitāboñ meñ hāshiye nahīñ milte

aaj bhī zamāne meñ aadmī karishma haiñ

sho.abde to milte haiñ mo.ajize nahīñ milte

zindagī kā har lamha aarzū kā dushman hai

hādsoñ kī ḳhvāhish meñ hādse nahīñ milte

aaj qatl karnā bhī ban gayā hai fan 'zarrīñ'

qatl karne vāloñ ke kuchh pate nahīñ milte

jism-o-jaan ki basti mein silsile nahin milte

ab kisi bhi markaz se daere nahin milte

do-qadam bichhaDne se qafile nahin milte

manzilen to milti hain raste nahin milte

barha tarasha hai hum ne aap ka chehra

aap ko na jaane kyun aaine nahin milte

waqt ki kami kah kar jehl ko chhupate hain

aaj-kal kitabon mein hashiye nahin milte

aaj bhi zamane mein aadmi karishma hain

shoabde to milte hain moajize nahin milte

zindagi ka har lamha aarzu ka dushman hai

hadson ki KHwahish mein hadse nahin milte

aaj qatl karna bhi ban gaya hai fan 'zarrin'

qatl karne walon ke kuchh pate nahin milte