jism se ruh tak utarti hui

jism se ruuh tak utartī huī

ek ḳhushbū thī vo bikhartī huī

jaise tūfān koī Thahrā huā

jaise aafat koī guzartī huī

us kī peshānī jaise chaḌhtī dhuup

zulf us kī thī chhāñv kartī huī

us ke abrū koī ghanā jangal

aur palak thī uḌaan bhartī huī

us kā chehra thā phuul khiltā huā

aañkh goyā thī baat kartī huī

zulf us kī siyāh shab kī tarah

sub.h-e-‘āriz pe shaam kartī huī

us ke dandān motiyoñ jaise

us kī bolī diloñ ko hartī huī

us ke lab the chhalakte paimāne

us kī gardan surāhī bhartī huī

us kī āvāz ik nadī kī tarah

dil ke vīrāne se guzartī huī

us kā siina kushāda ik maidāñ

us pe chaTTān vo ubhartī huī

us kamar kī lachak ko kyā kahiye

jaise hirnī koī guzartī huī

aur maġhrūr mornī kī tarah

do qadam chaltī aur Thahartī huī

us kī āñkhoñ kī yaad hai chitvan

sahmī sahmī huī sī Dartī huī

yuuñ sañvartī thī aa.ine ke qarīb

jaise taqdīr ho sañvartī huī

mere kamre meñ ab bhī hai maujūd

ek tasvīr baat kartī huī

jism se ruh tak utarti hui

ek KHushbu thi wo bikharti hui

jaise tufan koi Thahra hua

jaise aafat koi guzarti hui

us ki peshani jaise chaDhti dhup

zulf us ki thi chhanw karti hui

us ke abru koi ghana jangal

aur palak thi uDan bharti hui

us ka chehra tha phul khilta hua

aankh goya thi baat karti hui

zulf us ki siyah shab ki tarah

subh-e-‘ariz pe sham karti hui

us ke dandan motiyon jaise

us ki boli dilon ko harti hui

us ke lab the chhalakte paimane

us ki gardan surahi bharti hui

us ki aawaz ek nadi ki tarah

dil ke virane se guzarti hui

us ka sina kushada ek maidan

us pe chaTTan wo ubharti hui

us kamar ki lachak ko kya kahiye

jaise hirni koi guzarti hui

aur maghrur morni ki tarah

do qadam chalti aur Thaharti hui

us ki aankhon ki yaad hai chitwan

sahmi sahmi hui si Darti hui

yun sanwarti thi aaine ke qarib

jaise taqdir ho sanwarti hui

mere kamre mein ab bhi hai maujud

ek taswir baat karti hui