jitne naghme the wajh-e-KHalish ban gae jitne nale the sarf-e-hawa ho gae

jitne naġhme the vaj.h-e-ḳhalish ban ga.e jitne naale the sarf-e-havā ho ga.e

ham vahī haiñ jo kal the magar kyā huā ham vahīñ haiñ magar kyā se kyā ho ga.e

jin ke dāman tahī aur ḳhālī the dil jin kī jur.at thī kam aur jaañ muzmahil

āstānoñ pe sajde vo karte rahe rafta rafta hamāre ḳhudā ho ga.e

is zamāne ke jo mīr-o-sultān the nau-e-ādam meñ ya.anī jo insān the

dil se paa.ī unhoñne vo nashv-o-numā tere kūche ke āḳhir gadā ho ga.e

shor sīnoñ meñ uTh uTh ke dabte rahe dil-jigar duur gurdoñ meñ khapte rahe

haath kitne the yaañ jo qalam ho ga.e saaz kyā kyā the jo be-sadā ho ga.e

yaar duniyā ke sāñche meñ Dhalte rahe sham.a fānūs the ham pighalte rahe

apnī tanhā-ravī apnā soz-e-darūñ ham bhī duniyā meñ ik mājrā ho ga.e

ab na ḳhatra hai dil meñ na koī ḳhalish ek baaqī rahā hai to rañg-e-tapish

dil subuk aur saada hai is taur se qarz jitne the goyā adā ho ga.e

ġham sañvarte rahe ham sambhalte rahe shauq manzil ke sheve badalte rahe

the jo nazdīk ham se vo ab duur haiñ the jo nā-āshnā āshnā ho ga.e

jitne naghme the wajh-e-KHalish ban gae jitne nale the sarf-e-hawa ho gae

hum wahi hain jo kal the magar kya hua hum wahin hain magar kya se kya ho gae

jin ke daman tahi aur KHali the dil jin ki jurat thi kam aur jaan muzmahil

aastanon pe sajde wo karte rahe rafta rafta hamare KHuda ho gae

is zamane ke jo mir-o-sultan the nau-e-adam mein yani jo insan the

dil se pai unhonne wo nashw-o-numa tere kuche ke aaKHir gada ho gae

shor sinon mein uTh uTh ke dabte rahe dil-jigar dur gurdon mein khapte rahe

hath kitne the yan jo qalam ho gae saz kya kya the jo be-sada ho gae

yar duniya ke sanche mein Dhalte rahe shama fanus the hum pighalte rahe

apni tanha-rawi apna soz-e-darun hum bhi duniya mein ek majra ho gae

ab na KHatra hai dil mein na koi KHalish ek baqi raha hai to rang-e-tapish

dil subuk aur sada hai is taur se qarz jitne the goya ada ho gae

gham sanwarte rahe hum sambhalte rahe shauq manzil ke shewe badalte rahe

the jo nazdik hum se wo ab dur hain the jo na-ashna aashna ho gae