jitne qisse hain mere shikwa-e-bedad hain sab

jitne qisse haiñ mire shikva-e-bedād haiñ sab

zikr kaahe ko haiñ afsāna-e-faryād haiñ sab

lillāh al-hamd ki maiñ ranj-farāmosh nahīñ

jo sitam tum ne kiye haiñ vo mujhe yaad haiñ sab

jis taraf dekhiye do tiin phaḌakte haiñ asiir

kyuuñ na sayyād ḳhushī ho qafas ābād haiñ sab

ḳhvāst-gārān-e-qazā haiñ tah-e-ḳhanjar be-tāb

shā.eq-e-husn-e-ijāzat tire jallād haiñ sab

un ko taklīf-risānī kī abas hai ta.alīm

nāla-o-āh-o-fuġhāñ tere sitam-zād haiñ sab

phuuT jaa.e jo phapholā to ravāñ hoñ aañsū

ashk ai jān-e-jahāñ ābla-buniyād haiñ sab

tauq-o-zanjīr ke ḳhvāhāñ haiñ tire dīvāne

roz-o-shab muntazir-e-ḳhidmat-e-haddād haiñ sab

kufr-o-islām barābar haiñ zamān-e-rahmat

husn jitne haiñ zamāne meñ ḳhudā-dād haiñ sab

tā-kujā kāvish-e-sayyād ajal hai nazdīk

ek din is qafas-e-jism se āzād haiñ sab

ab ye hālat hai ki dushman bhī duā dete haiñ

dast-bardāshta mere liye jallād haiñ sab

nā-tavāñ vo huuñ ki har baal vabāl-e-jāñ hai

zo.af se mū-e-badan ḳhanjar-e-faulād haiñ sab

saḳht jaañ huuñ mirī taskīñ ko batā de qātil

kis qadar ghar meñ tire ḳhanjar-e-faulād haiñ sab

maiñ huā qais huā vāmiq-e-bechāra huā

dil-giraftār haiñ sab āshiq-e-nāshād haiñ sab

āshiq-o-vahshī-o-dīvāna-o-rusvā kah ke

jis tarah chāhe bulā tere hī irshād haiñ sab

aamad aamad hai magar mere sahī qāmat kī

baaġh meñ har taraf istāda jo shamshād haiñ sab

ek se ek nirālā hai zamāne meñ hasīñ

jalva-e-nūr-e-ilāhī ye parī-zād haiñ sab

terī āñkhoñ ke jo mazmūn likhe haiñ maiñ ne

harf jitne nazar aate haiñ mujhe saad haiñ sab

duur tak terī guzargāh-e-jafā hai o turk

haft-aflāk mire maskan-e-fariyād haiñ sab

apne ash.ār kā ātish ne diyā aap javāb

mo'tariz ho jiye to qābil-e-īrād haiñ sab

raast kahtā huuñ ye maiñ 'nāshiḳh'-o-'saudā'-o-'nasīm'

apne andāz meñ be-misl haiñ ustād haiñ sab

jitne qisse hain mere shikwa-e-bedad hain sab

zikr kahe ko hain afsana-e-faryaad hain sab

lillah al-hamd ki main ranj-faramosh nahin

jo sitam tum ne kiye hain wo mujhe yaad hain sab

jis taraf dekhiye do tin phaDakte hain asir

kyun na sayyaad KHushi ho qafas aabaad hain sab

KHwast-garan-e-qaza hain tah-e-KHanjar be-tab

shaeq-e-husn-e-ijazat tere jallad hain sab

un ko taklif-risani ki abas hai talim

nala-o-ah-o-fughan tere sitam-zad hain sab

phuT jae jo phaphola to rawan hon aansu

ashk ai jaan-e-jahan aabla-buniyaad hain sab

tauq-o-zanjir ke KHwahan hain tere diwane

roz-o-shab muntazir-e-KHidmat-e-haddad hain sab

kufr-o-islam barabar hain zaman-e-rahmat

husn jitne hain zamane mein KHuda-dad hain sab

ta-kuja kawish-e-sayyaad ajal hai nazdik

ek din is qafas-e-jism se aazad hain sab

ab ye haalat hai ki dushman bhi dua dete hain

dast-bardashta mere liye jallad hain sab

na-tawan wo hun ki har baal wabaal-e-jaan hai

zoaf se mu-e-badan KHanjar-e-faulad hain sab

saKHt jaan hun meri taskin ko bata de qatil

kis qadar ghar mein tere KHanjar-e-faulad hain sab

main hua qais hua wamiq-e-bechaara hua

dil-giraftar hain sab aashiq-e-nashad hain sab

aashiq-o-wahshi-o-diwana-o-ruswa kah ke

jis tarah chahe bula tere hi irshad hain sab

aamad aamad hai magar mere sahi qamat ki

bagh mein har taraf istada jo shamshad hain sab

ek se ek nirala hai zamane mein hasin

jalwa-e-nur-e-ilahi ye pari-zad hain sab

teri aankhon ke jo mazmun likhe hain main ne

harf jitne nazar aate hain mujhe sad hain sab

dur tak teri guzargah-e-jafa hai o turk

haft-aflak mere maskan-e-fariyaad hain sab

apne ashaar ka aatish ne diya aap jawab

mo'tariz ho jiye to qabil-e-irad hain sab

rast kahta hun ye main 'nashiKH'-o-'sauda'-o-'nasim'

apne andaz mein be-misl hain ustad hain sab