jo aap apne waqt ke sanchon mein Dhal gae

jo aap apne vaqt ke sāñchoñ meñ Dhal ga.e

sach pūchhiye to ruḳh vo havā kā badal ga.e

sar par unhīñ ke vaqt ne rakkhā hai taaj bhī

jo Thokareñ zamāne kī khā kar sañbhal ga.e

maañ kā lihāz jin ko na hī baap kā ḳhayāl

aise bhī kuchh javān mohabbat meñ pal ga.e

tū mujh se duur thā to makāñ terā bach gayā

mere qarīb ke to makāñ saare jal ga.e

un ko bhī mere dard kā ehsās ho gayā

aañsū ḳhud un kī aañkh se do chaar Dhal ga.e

apnā hī qissa maiñ ne kiyā thā bayāñ abhī

lekin kisī ke chehre ke tevar badal ga.e

kuchh un kā ruḳh bhī badlā huā sā mujhe lagā

kuchh chaal mere saath sitāre bhī chal ga.e

mujh ko Dasā hai 'fauq' unhīñ ne hī baar baar

kuchh saañp āstīnoñ meñ merī jo pal ga.e

jo aap apne waqt ke sanchon mein Dhal gae

sach puchhiye to ruKH wo hawa ka badal gae

sar par unhin ke waqt ne rakkha hai taj bhi

jo Thokaren zamane ki kha kar sanbhal gae

man ka lihaz jin ko na hi bap ka KHayal

aise bhi kuchh jawan mohabbat mein pal gae

tu mujh se dur tha to makan tera bach gaya

mere qarib ke to makan sare jal gae

un ko bhi mere dard ka ehsas ho gaya

aansu KHud un ki aankh se do chaar Dhal gae

apna hi qissa main ne kiya tha bayan abhi

lekin kisi ke chehre ke tewar badal gae

kuchh un ka ruKH bhi badla hua sa mujhe laga

kuchh chaal mere sath sitare bhi chal gae

mujh ko Dasa hai 'fauq' unhin ne hi bar bar

kuchh sanp aastinon mein meri jo pal gae