jo ab jawan hai wo azm-e-jawan rahe na rahe

jo ab javāñ hai vo azm-e-javāñ rahe na rahe

bahār aa.e na aa.e ḳhizāñ rahe na rahe

pata nahīñ ki samundar meñ bād-e-tūfāñ bhī

safīna ho ke na ho bādbāñ rahe na rahe

qadam qadam pe ugī ranjishoñ ke aalam meñ

javār-e-yār dar-e-dostāñ rahe na rahe

ghar apnā bhar lo abhī ḳhair hai ujāloñ se

jab āñdhiyāñ hoñ diyā zau-fishāñ rahe na rahe

ham inqalāb kā baa.is jise samajhte haiñ

vo garm ḳhuun ragoñ meñ ravāñ rahe na rahe

nafas nafas hai sharābor jis kī nik.hat se

vo gul khileñ na khileñ gulsitāñ rahe na rahe

bhaTak rahe haiñ nishānoñ se tiir ab us ke

kaḌī abhī bhī vo dekho kamāñ rahe na rahe

abhī ubhār lo alfāz jo dabe hoñ 'nihāl'

dahan ke saath hamesha zabāñ rahe na rahe

jo ab jawan hai wo azm-e-jawan rahe na rahe

bahaar aae na aae KHizan rahe na rahe

pata nahin ki samundar mein baad-e-tufan bhi

safina ho ke na ho baadban rahe na rahe

qadam qadam pe ugi ranjishon ke aalam mein

jawar-e-yar dar-e-dostan rahe na rahe

ghar apna bhar lo abhi KHair hai ujalon se

jab aandhiyan hon diya zau-fishan rahe na rahe

hum inqalab ka bais jise samajhte hain

wo garm KHun ragon mein rawan rahe na rahe

nafas nafas hai sharabor jis ki nikhat se

wo gul khilen na khilen gulsitan rahe na rahe

bhaTak rahe hain nishanon se tir ab us ke

kaDi abhi bhi wo dekho kaman rahe na rahe

abhi ubhaar lo alfaz jo dabe hon 'nihaal'

dahan ke sath hamesha zaban rahe na rahe