jo ahd-e-nau mein KHamir-e-bashar banaya jae

jo ahd-e-nau meñ ḳhamīr-e-bashar banāyā jaa.e

sināñ ko haath to neze ko sar banāyā jaa.e

shab-e-hayāt ko aise sahar banāyā jaa.e

ik āftāb sar-e-chashm-e-tar banāyā jaa.e

mire havās ko ye kaun hukm detā hai

ki us ko markaz-e-qalb-o-nazar banāyā jaa.e

maiñ apne paikar-e-ḳhākī se mutma.in hī nahīñ

mire ḳhudā mujhe bār-e-digar banāyā jaa.e

darūn-e-zāt kisī kā ye jabr hai mujh par

usī ko jaan usī ko jigar banāyā jaa.e

sukūn-o-rāhat-e-jāñ ab kahīñ nahīñ mumkin

tumhāre dil ko hī ab mustaqar banāyā jaa.e

jo ham-nafas bhī ho hamrāz bhī ho hamdam bhī

usī ko kyoñ na bhalā ham-safar banāyā jaa.e

bahut hī tañg haiñ ye lā-makāñ ke galiyāre

so dasht-e-zāt ko hī rahguzar banāyā jaa.e

agar banānā hī lāzim hai kuchh to ai 'ḳhālid'

ḳhud apnī ḳhaak ko ab ke guhar banāyā jaa.e

jo ahd-e-nau mein KHamir-e-bashar banaya jae

sinan ko hath to neze ko sar banaya jae

shab-e-hayat ko aise sahar banaya jae

ek aaftab sar-e-chashm-e-tar banaya jae

mere hawas ko ye kaun hukm deta hai

ki us ko markaz-e-qalb-o-nazar banaya jae

main apne paikar-e-KHaki se mutmain hi nahin

mere KHuda mujhe bar-e-digar banaya jae

darun-e-zat kisi ka ye jabr hai mujh par

usi ko jaan usi ko jigar banaya jae

sukun-o-rahat-e-jaan ab kahin nahin mumkin

tumhaare dil ko hi ab mustaqar banaya jae

jo ham-nafas bhi ho hamraaz bhi ho hamdam bhi

usi ko kyon na bhala ham-safar banaya jae

bahut hi tang hain ye la-makan ke galiyare

so dasht-e-zat ko hi rahguzar banaya jae

agar banana hi lazim hai kuchh to ai 'KHalid'

KHud apni KHak ko ab ke guhar banaya jae