jo andheron mein misal-e-yad-e-baiza Thahre

jo añdheroñ meñ misāl-e-yad-e-baizā Thahre

bas vahī log zamāne meñ tamāshā Thahre

jo masīhā kī tavajjoh ho kisī aur taraf

manzil-e-dard meñ kis tarah mudāvā Thahre

aap ko rang-e-mohabbat bhī nazar aa jaa.e

merī āñkhoñ meñ zarā ḳhuun kā dariyā Thahre

darmiyāñ apne agar dard kā rishta na rahe

phir to duniyā meñ har ik shaḳhs akelā Thahre

dosto sang-e-malāmat pe na isrār karo

ham se ye baar na uTThegā ki shīsha Thahre

ab na shīrīñ hai na vo vā’da-e-fardā kā yaqīñ

dast-e-farhād meñ phir kis liye tesha Thahre

jo andheron mein misal-e-yad-e-baiza Thahre

bas wahi log zamane mein tamasha Thahre

jo masiha ki tawajjoh ho kisi aur taraf

manzil-e-dard mein kis tarah mudawa Thahre

aap ko rang-e-mohabbat bhi nazar aa jae

meri aankhon mein zara KHun ka dariya Thahre

darmiyan apne agar dard ka rishta na rahe

phir to duniya mein har ek shaKHs akela Thahre

dosto sang-e-malamat pe na israr karo

hum se ye bar na uTThega ki shisha Thahre

ab na shirin hai na wo wa’da-e-farda ka yaqin

dast-e-farhad mein phir kis liye tesha Thahre