jo ashk-e-dil-gudaz mein sharar na ho lahu na ho

jo ashk-e-dil-gudāz meñ sharar na ho lahū na ho

ye vāqi.a hai ishq-e-sāda-lauh surḳh-rū na ho

zarūrat-e-sahar mujhe na ḳhvāhish-e-shaguft-e-gul

vo chāk-e-pairahan mile jo hashr tak rafū na ho

jo rahguzar meñ pis gayā tire ḳhirām-e-nāz se

vo zarra-e-ḳhamosh bhī jabīn-e-ārzū na ho

jise ġhubār-e-rahguzar samajh ke tū guzar gayā

ḳhayāl kar kabhī vahī maqām-e-justujū na ho

tū gulshan-e-hayāt se nasīm kī tarah guzar

fareb-e-ḳhār-o-ḳhas na khā asīr-e-rang-o-bū na ho

sar-e-ġhurūr jhuk gayā jabīñ pur-āb ho ga.ī

vo hāl-e-dil samajh ga.e hazār guftugū na ho

nigāh ḳhaam hai abhī junūñ meñ puḳhtagī nahīñ

isī meñ ḳhair hai tirī vo shoḳh rū-ba-rū na ho

nazāra-e-jamāl bhī yaqīnan ik gunāh hai

mai-e-adab se 'faiz' agar nigāh kā vuzū na ho

jo ashk-e-dil-gudaz mein sharar na ho lahu na ho

ye waqia hai ishq-e-sada-lauh surKH-ru na ho

zarurat-e-sahar mujhe na KHwahish-e-shaguft-e-gul

wo chaak-e-pairahan mile jo hashr tak rafu na ho

jo rahguzar mein pis gaya tere KHiram-e-naz se

wo zarra-e-KHamosh bhi jabin-e-arzu na ho

jise ghubar-e-rahguzar samajh ke tu guzar gaya

KHayal kar kabhi wahi maqam-e-justuju na ho

tu gulshan-e-hayat se nasim ki tarah guzar

fareb-e-KHar-o-KHas na kha asir-e-rang-o-bu na ho

sar-e-ghurur jhuk gaya jabin pur-ab ho gai

wo haal-e-dil samajh gae hazar guftugu na ho

nigah KHam hai abhi junun mein puKHtagi nahin

isi mein KHair hai teri wo shoKH ru-ba-ru na ho

nazara-e-jamal bhi yaqinan ek gunah hai

mai-e-adab se 'faiz' agar nigah ka wuzu na ho