jo baat ek aap ki nichi nazar mein hai

jo baat ek aap kī nīchī nazar meñ hai

vo baat ai huzūr kahāñ chārāgar meñ hai

āñkhoñ kī is namī kā sabab pūchhte ho kyā

afsāna ik tavīl mirī chashm-e-tar meñ hai

jis ke ḳhayāl se hai munavvar ye kā.enāt

vo husn-e-be-panāh to mere jigar meñ hai

manzil kī justujū meñ jo niklā thā ek din

vo qāfila to sunte haiñ ab bhī safar meñ hai

paa.ī hai un ke chehra-e-anvar meñ bārhā

jo baat maiñ ne dekhī tulū-e-sahar meñ hai

ishq-o-vafā ḳhulūs-o-mohabbat hai zindagī

mutlaq nahīñ vo zindagī jo māl-o-zar meñ hai

chal kar zarā to dekh qadam to baḌhā ke dekh

ik chāshnī ajiib rah-e-pur-ḳhatar meñ hai

ye aur baat hai ki huuñ 'manzar' qafas-nashīñ

varna balā kī taab mire bāl-o-par meñ hai

jo baat ek aap ki nichi nazar mein hai

wo baat ai huzur kahan chaaragar mein hai

aankhon ki is nami ka sabab puchhte ho kya

afsana ek tawil meri chashm-e-tar mein hai

jis ke KHayal se hai munawwar ye kaenat

wo husn-e-be-panah to mere jigar mein hai

manzil ki justuju mein jo nikla tha ek din

wo qafila to sunte hain ab bhi safar mein hai

pai hai un ke chehra-e-anwar mein barha

jo baat main ne dekhi tulu-e-sahar mein hai

ishq-o-wafa KHulus-o-mohabbat hai zindagi

mutlaq nahin wo zindagi jo mal-o-zar mein hai

chal kar zara to dekh qadam to baDha ke dekh

ek chashni ajib rah-e-pur-KHatar mein hai

ye aur baat hai ki hun 'manzar' qafas-nashin

warna bala ki tab mere baal-o-par mein hai