jo baat haqiqat ho be-KHauf-o-KHatar kahiye

jo baat haqīqat ho be-ḳhauf-o-ḳhatar kahiye

maiñ is kā nahīñ qaa.il shabnam ko guhar kahiye

lafzoñ kī harārat se ajsām pighal jaa.eñ

sanjīda zarā ho kar ash'ār agar kahiye

apnoñ ne pilā.e haiñ zahrāb ke ghūñT aksar

hoñToñ pe jo ḳhushkī hai talḳhī kā asar kahiye

bāzār-e-tasanno.a ke jalvoñ kī numā.ish ko

TuuTe hue shīshoñ kā adnā sā khañDar kahiye

jazbāt kā ḳhuuñ kar duuñ ehsās kuchal Dālūñ

zaḳhmoñ se lahū Tapke sau baar agar kahiye

taḳhlīq-e-ajussā yā 'hāfiz' kī ġhazal 'rahbar'

jis se ho baqā fan kī me.arāj-e-hunar kahiye

jo baat haqiqat ho be-KHauf-o-KHatar kahiye

main is ka nahin qail shabnam ko guhar kahiye

lafzon ki hararat se ajsam pighal jaen

sanjida zara ho kar ash'ar agar kahiye

apnon ne pilae hain zahrab ke ghunT aksar

honTon pe jo KHushki hai talKHi ka asar kahiye

bazar-e-tasannoa ke jalwon ki numaish ko

TuTe hue shishon ka adna sa khanDar kahiye

jazbaat ka KHun kar dun ehsas kuchal Dalun

zaKHmon se lahu Tapke sau bar agar kahiye

taKHliq-e-ajussa ya 'hafiz' ki ghazal 'rahbar'

jis se ho baqa fan ki mearaj-e-hunar kahiye