jo bad-gumani ki surat hai wo badal jae

jo bad-gumānī kī sūrat hai vo badal jaa.e

use kaho ki nibhānā hai to sañbhal jaa.e

kabhī to harf-e-tamannā kā naqsh ho dil par

kabhī sukūt bhī to guftugū meñ Dhal jaa.e

mile to kaise mile ajr 'ishq kā tujh ko

agar tū ḳhalvat-e-dushvār meñ phisal jaa.e

mirā nahīñ na sahī par barā-e-'azmat-e-'ishq

kisī kā ḳhvāb to āñkhoñ meñ terī pal jaa.e

visāl-e-yār qayāmat se kam nahīñ hotā

ḳhudā kare ki qayāmat kā vaqt Tal jaa.e

koī batā.e charāġhoñ kā zor kyā hogā

ki jis ke Dar se havāoñ kā dil dahal jaa.e

bulandiyāñ bhī mileñgī zavāl meñ 'aḳhtar'

misāl-e-sham’ tirī zaat jo pighal jaa.e

jo bad-gumani ki surat hai wo badal jae

use kaho ki nibhana hai to sanbhal jae

kabhi to harf-e-tamanna ka naqsh ho dil par

kabhi sukut bhi to guftugu mein Dhal jae

mile to kaise mile ajr 'ishq ka tujh ko

agar tu KHalwat-e-dushwar mein phisal jae

mera nahin na sahi par bara-e-'azmat-e-'ishq

kisi ka KHwab to aankhon mein teri pal jae

visal-e-yar qayamat se kam nahin hota

KHuda kare ki qayamat ka waqt Tal jae

koi batae charaghon ka zor kya hoga

ki jis ke Dar se hawaon ka dil dahal jae

bulandiyan bhi milengi zawal mein 'aKHtar'

misal-e-sham’ teri zat jo pighal jae