jo barf-zar chir de aisi kiran bhi la

jo barf-zār chiir de aisī kiran bhī lā

patthar diloñ meñ aaj koī kohkan bhī lā

is tarah sarsarī mirā bāb-e-vafā na likh

vaqt-e-shumār zaḳhm mirā ḳhasta-tan bhī lā

munsif agar banā hai to sab ko gavāra rakh

insāf hai to merā phaTā pairahan bhī lā

jalne lage haiñ pyaas se phūloñ ke ḳhushk hoñT

abr-e-bahār ko zarā sū-e-chaman bhī lā

chup-chāp ḳhalvatoñ meñ pighalne se fā.eda

koī charāġh hai to sar-e-anjuman bhī lā

itnā vo shādmāñ mujhe achchhā nahīñ lagā

is gul ke dil meñ daaġh kī thoḌī jalan bhī lā

zaḳhm-e-safar ke dard-e-musalsal kā sehr toḌ

niklā huā vatan se ġharīb-ul-vatan bhī lā

ye chashm-e-iltifāt hī kaafī nahīñ mujhe

mere liye to narmī-e-kām-o-dahan bhī lā

'shāhīn' se aziiz hai apnā lahū to kyā

na.ash-e-shahīd ke liye ḳhūnīñ kafan bhī lā

jo barf-zar chir de aisi kiran bhi la

patthar dilon mein aaj koi kohkan bhi la

is tarah sarsari mera bab-e-wafa na likh

waqt-e-shumar zaKHm mera KHasta-tan bhi la

munsif agar bana hai to sab ko gawara rakh

insaf hai to mera phaTa pairahan bhi la

jalne lage hain pyas se phulon ke KHushk honT

abr-e-bahaar ko zara su-e-chaman bhi la

chup-chap KHalwaton mein pighalne se faeda

koi charagh hai to sar-e-anjuman bhi la

itna wo shadman mujhe achchha nahin laga

is gul ke dil mein dagh ki thoDi jalan bhi la

zaKHm-e-safar ke dard-e-musalsal ka sehr toD

nikla hua watan se gharib-ul-watan bhi la

ye chashm-e-iltifat hi kafi nahin mujhe

mere liye to narmi-e-kaam-o-dahan bhi la

'shahin' se aziz hai apna lahu to kya

nash-e-shahid ke liye KHunin kafan bhi la