jo bashar KHud ko bhi na pahchane

jo bashar ḳhud ko bhī na pahchāne

vo rumūz-e-hayāt kyā jaane

vahī sham'eñ vahī haiñ parvāne

log dohrā rahe haiñ afsāne

jī meñ kyā aa.ī aaj ai nāseh

aa.e ho mai-kade meñ samjhāne

har galī meñ haiñ har zabāñ par haiñ

merī dīvāngī ke afsāne

dil ko ḳhadshoñ ne aa ke gher liyā

lī jo chuTkī kisī tamannā ne

jis ne duniyā meñ haq-parastī kī

us ko jiine diyā na duniyā ne

uf fareb-e-jamāl-e-zauq-e-nazar

ham unheñ aaj bhī na pahchāne

farq kyā tujh meñ ham meñ ai nāseh

tū bhī dīvāna ham bhī dīvāne

sāf-goī kā ye natīja hai

apne bhī ho ga.e haiñ begāne

saarī duniyā ko un se nisbat hai

ham se vābasta haiñ jo afsāne

mehr-o-māh-o-nujūm kuchh bhī nahīñ

tū jo apnī ḳhudī ko pahchāne

ham ne duniyā ko phir bhī apnāyā

ġham diye go hazāroñ duniyā ne

mo'jiza hai ki bazm-e-'ābid' meñ

raqs farmā rahe haiñ paimāne

jo bashar KHud ko bhi na pahchane

wo rumuz-e-hayat kya jaane

wahi sham'en wahi hain parwane

log dohra rahe hain afsane

ji mein kya aai aaj ai naseh

aae ho mai-kade mein samjhane

har gali mein hain har zaban par hain

meri diwangi ke afsane

dil ko KHadshon ne aa ke gher liya

li jo chuTki kisi tamanna ne

jis ne duniya mein haq-parasti ki

us ko jine diya na duniya ne

uf fareb-e-jamal-e-zauq-e-nazar

hum unhen aaj bhi na pahchane

farq kya tujh mein hum mein ai naseh

tu bhi diwana hum bhi diwane

saf-goi ka ye natija hai

apne bhi ho gae hain begane

sari duniya ko un se nisbat hai

hum se wabasta hain jo afsane

mehr-o-mah-o-nujum kuchh bhi nahin

tu jo apni KHudi ko pahchane

hum ne duniya ko phir bhi apnaya

gham diye go hazaron duniya ne

mo'jiza hai ki bazm-e-'abid' mein

raqs farma rahe hain paimane