jo bhi barbaadiyan thin qaza le gai

jo bhī barbādiyāñ thiiñ qazā le ga.ī

zindagī apnā dāman bachā le ga.ī

ḳhushk patte kī sūrat maiñ uḌtā rahā

jis taraf mujh ko chāhā havā le ga.ī

chāk-dāmanī merī guloñ ko milī

rang mere lahū kā hinā le ga.ī

fasl-e-gul meñ gulistāñ ko kyā mil gayā

gil ko gulchīñ mahak ko sabā le ga.ī

zindagī zindagī se gurezāñ huī

lutf jiine kā shāyad anā le ga.ī

aur chāhe hai kyā mujh se dīvāngī

sar se chādar badan se qabā le ga.ī

ḳhuub duniyā ne luuTā hai mujh ko magar

ḳhulq merā na merī vafā le ga.ī

tū ne āvāz de kar tamāshā kiyā

duur tak mujh ko terī sadā le ga.ī

vo musāfir huuñ shahr-e-butāñ kā 'nazīr'

chashm-e-bīnā mirī ḳhāk-e-pā le ga.ī

jo bhi barbaadiyan thin qaza le gai

zindagi apna daman bacha le gai

KHushk patte ki surat main uDta raha

jis taraf mujh ko chaha hawa le gai

chaak-damani meri gulon ko mili

rang mere lahu ka hina le gai

fasl-e-gul mein gulistan ko kya mil gaya

gil ko gulchin mahak ko saba le gai

zindagi zindagi se gurezan hui

lutf jine ka shayad ana le gai

aur chahe hai kya mujh se diwangi

sar se chadar badan se qaba le gai

KHub duniya ne luTa hai mujh ko magar

KHulq mera na meri wafa le gai

tu ne aawaz de kar tamasha kiya

dur tak mujh ko teri sada le gai

wo musafir hun shahr-e-butan ka 'nazir'

chashm-e-bina meri KHak-e-pa le gai