jo bhi ghuncha tere honTon pe khila karta hai

jo bhī ġhuncha tire hoñToñ pe khilā kartā hai

vo tirī tañgī-e-dāmāñ kā gilā kartā hai

der se aaj mirā sar hai tire zaanū par

ye vo rutba hai jo shāhoñ ko milā kartā hai

maiñ to baiThā huuñ dabā.e hue tūfānoñ ko

tū mire dil ke dhaḌakne kā gilā kartā hai

raat yuuñ chāñd ko dekhā hai nadī meñ raqsāñ

jaise jhūmar tire māthe pe hilā kartā hai

jab mirī sej pe hotā hai bahāroñ kā nuzūl

sirf ik phuul kivāḌoñ meñ khulā kartā hai

kaun kāfir tujhe ilzām-e-taġhāful degā

jo bhī kartā hai mohabbat se gilā kartā hai

log kahte haiñ jise niil kañval vo to 'qatīl'

shab ko in jhiil sī āñkhoñ meñ khulā kartā hai

jo bhi ghuncha tere honTon pe khila karta hai

wo teri tangi-e-daman ka gila karta hai

der se aaj mera sar hai tere zanu par

ye wo rutba hai jo shahon ko mila karta hai

main to baiTha hun dabae hue tufanon ko

tu mere dil ke dhaDakne ka gila karta hai

raat yun chand ko dekha hai nadi mein raqsan

jaise jhumar tere mathe pe hila karta hai

jab meri sej pe hota hai bahaaron ka nuzul

sirf ek phul kiwaDon mein khula karta hai

kaun kafir tujhe ilzam-e-taghaful dega

jo bhi karta hai mohabbat se gila karta hai

log kahte hain jise nil kanwal wo to 'qatil'

shab ko in jhil si aankhon mein khula karta hai