jo bhi shai mange hai wo hosh-ruba mange hai

jo bhī shai māñge hai vo hosh-rubā māñge hai

intihā ye hai ki bande se ḳhudā māñge hai

ek hī saf meñ nazar aate haiñ qātil maqtūl

kaun hai apne kiye kī jo sazā māñge hai

kal jo ḳhud nuur thā vo dil bhī ujāle ke liye

aaj chaḌhte hue sūraj se ziyā māñge hai

dekhiye ab to ḳhizāñ sūkhe hue aa'zā ko

Dhāñkne ke liye phūloñ kī ridā māñge hai

ek hī mashġhala rahtā hai shab-o-roz use

mere mar jaane kī kambaḳht du'ā māñge hai

āñsuoñ kā jo ḳhazāna hai in āñkhoñ meñ 'ra.īs'

apne dāman meñ vahī bād-e-sabā māñge hai

jo bhi shai mange hai wo hosh-ruba mange hai

intiha ye hai ki bande se KHuda mange hai

ek hi saf mein nazar aate hain qatil maqtul

kaun hai apne kiye ki jo saza mange hai

kal jo KHud nur tha wo dil bhi ujale ke liye

aaj chaDhte hue suraj se ziya mange hai

dekhiye ab to KHizan sukhe hue aa'za ko

Dhankne ke liye phulon ki rida mange hai

ek hi mashghala rahta hai shab-o-roz use

mere mar jaane ki kambaKHt du'a mange hai

aansuon ka jo KHazana hai in aankhon mein 'rais'

apne daman mein wahi baad-e-saba mange hai