jo bujh gaya usi manzar pe rakh ke aaya hun

jo bujh gayā usī manzar pe rakh ke aayā huuñ

maiñ sab asāsa-e-dil ghar pe rakh ke aayā huuñ

batā maiñ kyā karūñ ab ai mirī tahī-dastī

ki jitne ḳhvāb the bistar pe rakh ke aayā huuñ

jo le ga.ī use mauj-e-fanā to hairat kyā

maiñ apnā jism samundar pe rakh ke aayā huuñ

harā-bharā huuñ bahāroñ ke zaḳhm khāte hue

in uñgliyoñ ko gul-e-tar pe rakh ke aayā huuñ

ye maiñ nahīñ mirī parchhā.īñ hai tire aage

ki apnā aap to maiñ ghar pe rakh ke aayā huuñ

bahut niDhāl huī hai thakan se ruuh mirī

maiñ apnī ḳhāk-e-badan sar pe rakh ke aayā huuñ

jo bujh gaya usi manzar pe rakh ke aaya hun

main sab asasa-e-dil ghar pe rakh ke aaya hun

bata main kya karun ab ai meri tahi-dasti

ki jitne KHwab the bistar pe rakh ke aaya hun

jo le gai use mauj-e-fana to hairat kya

main apna jism samundar pe rakh ke aaya hun

hara-bhara hun bahaaron ke zaKHm khate hue

in ungliyon ko gul-e-tar pe rakh ke aaya hun

ye main nahin meri parchhain hai tere aage

ki apna aap to main ghar pe rakh ke aaya hun

bahut niDhaal hui hai thakan se ruh meri

main apni KHak-e-badan sar pe rakh ke aaya hun