jo bujh sake na kabhi dil mein hai wo aag bhari

jo bujh sake na kabhī dil meñ hai vo aag bharī

balā-e-jāñ hai mohabbat meñ fitrat-e-basharī

qafas meñ ham ne hazāroñ asiir dekhe haiñ

rahā hai kis kā salāmat ġhurūr-e-bāl-o-parī

tire jamāl ke asrār kaun samjhegā

panāh maañg rahā hai shu.ūr-e-dīda-darī

safar adam kā hai dushvār tū akelā hai

mujhe bhī saath liye chal sitāra-e-saharī

banā banā ke har ik shīsha toḌ detā hai

ajiib shai hai mire shīshagar kī shīshagarī

tabāhiyoñ kā zamāna hai hoshiyār raho

ḳhabar ke rañg meñ zāhir huī hai be-ḳhabarī

junūñ kā muzhda-e-fursat ki in dinoñ 'shāriq'

ḳhirad kā dast-e-mubārak hai vaqf-e-jāma-darī

jo bujh sake na kabhi dil mein hai wo aag bhari

bala-e-jaan hai mohabbat mein fitrat-e-bashari

qafas mein hum ne hazaron asir dekhe hain

raha hai kis ka salamat ghurur-e-baal-o-pari

tere jamal ke asrar kaun samjhega

panah mang raha hai shuur-e-dida-dari

safar adam ka hai dushwar tu akela hai

mujhe bhi sath liye chal sitara-e-sahari

bana bana ke har ek shisha toD deta hai

ajib shai hai mere shishagar ki shishagari

tabahiyon ka zamana hai hoshiyar raho

KHabar ke rang mein zahir hui hai be-KHabari

junun ka muzhda-e-fursat ki in dinon 'shaariq'

KHirad ka dast-e-mubarak hai waqf-e-jama-dari