jo chahun bhi to ab KHud ko badal sakta nahin hun

jo chāhūñ bhī to ab ḳhud ko badal saktā nahīñ huuñ

samundar huuñ kināroñ se nikal saktā nahīñ huuñ

maiñ yaḳh-basta fazāoñ meñ asīr-e-zindagī huuñ

tirī sāñsoñ kī garmī se pighal saktā nahīñ huuñ

mire paañv ke nīche jo zamīñ hai ghūmtī hai

to yuuñ ai āsmāñ maiñ bhī sambhal saktā nahīñ huuñ

ḳhud apne dushmanoñ ke saath samjhautā hai mumkin

maiñ tere dushmanoñ ke saath chal saktā nahīñ huuñ

vo paudā nafratoñ kā hai jahāñ chāhe ugā lo

mohabbat huuñ maiñ har miTTī meñ phal saktā nahīñ huuñ

unheñ laḌnā paḌegā mujh se jab tak huuñ maiñ zinda

hisār-e-dushmanāñ se go nikal saktā nahīñ huuñ

khule haiñ rāste kitne mire raste meñ 'azmī'

magar maiñ huuñ ki har sāñche meñ Dhal saktā nahīñ huuñ

jo chahun bhi to ab KHud ko badal sakta nahin hun

samundar hun kinaron se nikal sakta nahin hun

main yaKH-basta fazaon mein asir-e-zindagi hun

teri sanson ki garmi se pighal sakta nahin hun

mere panw ke niche jo zamin hai ghumti hai

to yun ai aasman main bhi sambhal sakta nahin hun

KHud apne dushmanon ke sath samjhauta hai mumkin

main tere dushmanon ke sath chal sakta nahin hun

wo pauda nafraton ka hai jahan chahe uga lo

mohabbat hun main har miTTi mein phal sakta nahin hun

unhen laDna paDega mujh se jab tak hun main zinda

hisar-e-dushmanan se go nikal sakta nahin hun

khule hain raste kitne mere raste mein 'azmi'

magar main hun ki har sanche mein Dhal sakta nahin hun