jo chand ko aaghosh mein lene pe aDa tha

jo chāñd ko āġhosh meñ lene pe aḌā thā

har chand vo bachcha thā magar dil kā baḌā thā

jab apnī hī pahchān se ran apnā paḌā thā

ham aise jiyāloñ pe bhī vo vaqt kaḌā thā

tūfān se laḌne kī 'alāmat thā jo socho

yuuñ kahne ko miTTī kā vo ik kachchā ghaḌā thā

khul kar mujhe ik saañs kā lenā bhī thā mushkil

hālāt kā neza mire siine meñ gaḌā thā

vo tiir chalātā rahā nazdīk samajh kar

lekin maiñ nishāne se bahut duur khaḌā thā

dekhā to hameñ Tuut ke do TukḌe hue the

dushman kī safoñ meñ bhī hamārā hī dhaḌā thā

har dhuup meñ jalnā hī rahā us kā muqaddar

dīvār kā saaya pas-e-dīvār paḌā thā

hangāma-e-jāñ shor-e-anā dil kī qayāmat

maiñ kitne mahāzoñ pe akelā hī laḌā thā

har zaḳhm jo baḳhshā thā mujhe us kī nazar ne

ai 'badr' nagīne kī tarah dil meñ jaḌā thā

jo chand ko aaghosh mein lene pe aDa tha

har chand wo bachcha tha magar dil ka baDa tha

jab apni hi pahchan se ran apna paDa tha

hum aise jiyalon pe bhi wo waqt kaDa tha

tufan se laDne ki 'alamat tha jo socho

yun kahne ko miTTi ka wo ek kachcha ghaDa tha

khul kar mujhe ek sans ka lena bhi tha mushkil

haalat ka neza mere sine mein gaDa tha

wo tir chalata raha nazdik samajh kar

lekin main nishane se bahut dur khaDa tha

dekha to hamein Tut ke do TukDe hue the

dushman ki safon mein bhi hamara hi dhaDa tha

har dhup mein jalna hi raha us ka muqaddar

diwar ka saya pas-e-diwar paDa tha

hangama-e-jaan shor-e-ana dil ki qayamat

main kitne mahazon pe akela hi laDa tha

har zaKHm jo baKHsha tha mujhe us ki nazar ne

ai 'badr' nagine ki tarah dil mein jaDa tha