jo chand log mere sher sun ke jate hain

jo chand log mire she'r sun ke jaate haiñ

tilism-e-hosh-rubā paḌhne baiTh jaate haiñ

masarratoñ ko samajhne kī kaisī rut aa.ī

sagān-e-shahr bhī ab qahqahe lagāte haiñ

libās maañg ke pahnā hai kuchh rafīqoñ ne

aur us pe lutf mujhe aa.ina dikhāte haiñ

vahī batā.eñge tanhā shaboñ kī me'rājeñ

jo apnī zaat ke madfan meñ Duub jaate haiñ

har ek lamha kasī jā rahī haiñ zanjīreñ

'ajab ġhulām haiñ ham phir bhī muskurāte haiñ

na-jāne kaun mujhe yaad kar ke royā 'qais'

havā ke dosh pe ashkoñ ke jaam aate haiñ

jo chand log mere she'r sun ke jate hain

tilism-e-hosh-ruba paDhne baiTh jate hain

masarraton ko samajhne ki kaisi rut aai

sagan-e-shahr bhi ab qahqahe lagate hain

libas mang ke pahna hai kuchh rafiqon ne

aur us pe lutf mujhe aaina dikhate hain

wahi bataenge tanha shabon ki me'rajen

jo apni zat ke madfan mein Dub jate hain

har ek lamha kasi ja rahi hain zanjiren

'ajab ghulam hain hum phir bhi muskuraate hain

na-jaane kaun mujhe yaad kar ke roya 'qais'

hawa ke dosh pe ashkon ke jam aate hain