jo chand sikkon ki chah mein kin wo hijraten kya shumar karna

jo chand sikkoñ kī chaah meñ kiiñ vo hijrateñ kyā shumār karnā

safar meñ apnoñ se dūriyoñ kī aziyyateñ kyā shumār karnā

jo mere dil kī ujaaḌ bastī meñ ek mausam Thahar gayā hai

balā se aa.e bahār yā phir ḳhizāñ ruteñ kyā shumār karnā

jo raushnī kā nagar kabhī thā vo aaj añdheroñ meñ gum huā hai

ujaaḌ añdherī udaas vīrāñ imārateñ kyā shumār karnā

sameT leñge ham apne dāman meñ apne hisse kī nafratoñ ko

na thiiñ hamāre nasīb meñ jo vo chāhateñ kyā shumār karnā

munāfiqat ke ġharaz ke rishtoñ meñ kyuuñ vafā ko talāshtī ho

ḳhulūs-e-dil gar na ho to aisī qarābateñ kyā shumār karnā

mohabbatoñ meñ vo bhīge lamhe vo guzre pal vo ruteñ jo bītīñ

kahīñ fazāoñ meñ kho ga.iiñ jo vo sā.ateñ kyā shumār karnā

bhulā diiñ ham ne jafā.eñ saarī sitam vo saare bhulā diye haiñ

jo tum ho apne to ab tumhārī adāvateñ kyā shumār karnā

likhe the naam apne jin pe ham ne daraḳht saare vo kaT chuke haiñ

miTā diyā vaqt ne jinheñ vo ibārateñ kyā shumār karnā

rahīñ diloñ meñ na vus.ateñ ab na fursateñ ab na chāhateñ ab

na ab mayassar kabhī jo hoñgī vo sohbateñ kyā shumār karnā

ye sīm-o-zar ye harīr-o-atlas ye jāh-o-hashmat ye auj-o-sarvat

sukūn-e-dil hī na de sakeñ jo vo rāhateñ kyā shumār karnā

vo chāhateñ haiñ jo ḳhuun ban kar ragoñ meñ daurān kar rahī haiñ

mohabbatoñ se bharā ho dāman to nafrateñ kyā shumār karnā

tirī razā pe jhukā ke sar ko jo zer-e-teġh-e-sitam kiyā thā

vo ek sajda hai sab pe bhārī ibādateñ kyā shumār karnā

jo sham-e-bazm-e-suḳhan kabhī the na koī ab un ko jāntā hai

davām jin ko huā na hāsil vo shohrateñ kyā shumār karnā

na jaane mahrūmiyoñ ke kitne hī daaġh dilbar saje hue haiñ

kabhī jo puurī na ho sakeñgī vo hasrateñ kyā shumār karnā

ho rā.egāñ har safar to 'anjum' tamām raste haiñ ek jaise

na manzileñ jab nasīb meñ hoñ masāfateñ kyā shumār karnā

jo chand sikkon ki chah mein kin wo hijraten kya shumar karna

safar mein apnon se duriyon ki aziyyaten kya shumar karna

jo mere dil ki ujaD basti mein ek mausam Thahar gaya hai

bala se aae bahaar ya phir KHizan ruten kya shumar karna

jo raushni ka nagar kabhi tha wo aaj andheron mein gum hua hai

ujaD andheri udas viran imaraten kya shumar karna

sameT lenge hum apne daman mein apne hisse ki nafraton ko

na thin hamare nasib mein jo wo chahaten kya shumar karna

munafiqat ke gharaz ke rishton mein kyun wafa ko talashti ho

KHulus-e-dil gar na ho to aisi qarabaten kya shumar karna

mohabbaton mein wo bhige lamhe wo guzre pal wo ruten jo bitin

kahin fazaon mein kho gain jo wo saaten kya shumar karna

bhula din hum ne jafaen sari sitam wo sare bhula diye hain

jo tum ho apne to ab tumhaari adawaten kya shumar karna

likhe the nam apne jin pe hum ne daraKHt sare wo kaT chuke hain

miTa diya waqt ne jinhen wo ibaraten kya shumar karna

rahin dilon mein na wusaten ab na fursaten ab na chahaten ab

na ab mayassar kabhi jo hongi wo sohbaten kya shumar karna

ye sim-o-zar ye harir-o-atlas ye jah-o-hashmat ye auj-o-sarwat

sukun-e-dil hi na de saken jo wo rahaten kya shumar karna

wo chahaten hain jo KHun ban kar ragon mein dauran kar rahi hain

mohabbaton se bhara ho daman to nafraten kya shumar karna

teri raza pe jhuka ke sar ko jo zer-e-tegh-e-sitam kiya tha

wo ek sajda hai sab pe bhaari ibaadaten kya shumar karna

jo sham-e-bazm-e-suKHan kabhi the na koi ab un ko jaanta hai

dawam jin ko hua na hasil wo shohraten kya shumar karna

na jaane mahrumiyon ke kitne hi dagh dilbar saje hue hain

kabhi jo puri na ho sakengi wo hasraten kya shumar karna

ho raegan har safar to 'anjum' tamam raste hain ek jaise

na manzilen jab nasib mein hon masafaten kya shumar karna