jo chashm-e-shauq ki haalat se aashkar na tha

jo chashm-e-shauq kī hālat se āshkār na thā

vo intizār ba-'unvān-e-intizār na thā

ye aur kyā thā kisī kā jo intizār na thā

nazar ko chain na thā qalb ko qarār na thā

‘urūj-e-ishq meñ thiiñ bad-gumāniyāñ aisī

kisī kā zikr hī kyā apnā e'tibār na thā

tire ḳhayāl kī nairangiyoñ kā thā ye asar

kabhī qarār thā dil ko kabhī qarār na thā

mujhe vahāñ ke nazāre kā haal kyā mā'lūm

jahāñ nigāh uThāne kā iḳhtiyār na thā

na aa.e vo mujhe thā jin kā intizār shadīd

qayāmat aa.ī qayāmat kā intizār na thā

qarār us kī judā.ī meñ kis tarah aatā

ḳhayāl jab kisī markaz pe barqarār na thā

jo e'tibār dilāyā thā aap ne mujh ko

vo e'tibār kā dhoka thā e'tibār na thā

jab us ke sāmne pahuñchā huuñ maiñ nahīñ mā'lūm

qarār thā mujhe us vaqt yā qarār na thā

uḌaa.e the tire jalve ne jis ke hosh-o-havās

vo hoshiyār huā bhī to hoshiyār na thā

jamāl-e-yār kā 'ain-ul-yaqīn thā lekin

mirī nazar kā mire dil ko e'tibār na thā

hamāre dil kā talavvun are ma.āz-allāh

nizām-e-fikr bahar-hāl barqarār na thā

vo kis maqām pe thā terā naqsh-e-pā aisā

jo mere sajda-e-ulfat kī yādgār na thā

maiñ kyā batā.ūñ unheñ 'qadr' jo ye pūchhte haiñ

bhar aa.iiñ kis liye āñkheñ jo dil pe baar na thā

jo chashm-e-shauq ki haalat se aashkar na tha

wo intizar ba-'unwan-e-intizar na tha

ye aur kya tha kisi ka jo intizar na tha

nazar ko chain na tha qalb ko qarar na tha

‘uruj-e-ishq mein thin bad-gumaniyan aisi

kisi ka zikr hi kya apna e'tibar na tha

tere KHayal ki nairangiyon ka tha ye asar

kabhi qarar tha dil ko kabhi qarar na tha

mujhe wahan ke nazare ka haal kya ma'lum

jahan nigah uThane ka iKHtiyar na tha

na aae wo mujhe tha jin ka intizar shadid

qayamat aai qayamat ka intizar na tha

qarar us ki judai mein kis tarah aata

KHayal jab kisi markaz pe barqarar na tha

jo e'tibar dilaya tha aap ne mujh ko

wo e'tibar ka dhoka tha e'tibar na tha

jab us ke samne pahuncha hun main nahin ma'lum

qarar tha mujhe us waqt ya qarar na tha

uDae the tere jalwe ne jis ke hosh-o-hawas

wo hoshiyar hua bhi to hoshiyar na tha

jamal-e-yar ka 'ain-ul-yaqin tha lekin

meri nazar ka mere dil ko e'tibar na tha

hamare dil ka talawwun are maaz-allah

nizam-e-fikr bahar-haal barqarar na tha

wo kis maqam pe tha tera naqsh-e-pa aisa

jo mere sajda-e-ulfat ki yaadgar na tha

main kya bataun unhen 'qadr' jo ye puchhte hain

bhar aain kis liye aankhen jo dil pe bar na tha