jo chiz muqaddar mein nahin hai wo nahin hai

jo chiiz muqaddar meñ nahīñ hai vo nahīñ hai

ummīd phir us chiiz kī kyoñ zehn-nashīñ hai

tujh ko na yaqīñ ho to nigāhoñ se mirī dekh

koī bhī hai duniyā meñ to ik tū hī hasīñ hai

ab koī ise kufr samajhtā ho to samjhe

tū paañv jahāñ rakh de vahīñ arsh-e-barīñ hai

kuchh roz se aalam hai ye dīvāne kā tere

dil aur kahīñ hai to nazar aur kahīñ hai

tū chāñd pe jā chāhe sitāroñ pe chalā jā

ai ḳhaak ke putle tire rahne ko zamīñ hai

sirf is ke liye dahr ke ġham mol liye haiñ

jo dil meñ makīñ hai mirī āñkhoñ meñ makīñ hai

jis shāḳh pe jaltā huā chhoḌā thā nasheman

maiñ kunj-e-qafas meñ huuñ mirī ruuh vahīñ hai

ahbāb mire mujh se ye kyoñ pūchh rahe haiñ

ab rasm-e-vafā saare zamāne meñ kahīñ hai

shikva na shikāyat hai koī ahl-e-sitam se

'manzil' meñ nahīñ hai to yahī chiiz nahīñ hai

jo chiz muqaddar mein nahin hai wo nahin hai

ummid phir us chiz ki kyon zehn-nashin hai

tujh ko na yaqin ho to nigahon se meri dekh

koi bhi hai duniya mein to ek tu hi hasin hai

ab koi ise kufr samajhta ho to samjhe

tu panw jahan rakh de wahin arsh-e-barin hai

kuchh roz se aalam hai ye diwane ka tere

dil aur kahin hai to nazar aur kahin hai

tu chand pe ja chahe sitaron pe chala ja

ai KHak ke putle tere rahne ko zamin hai

sirf is ke liye dahr ke gham mol liye hain

jo dil mein makin hai meri aankhon mein makin hai

jis shaKH pe jalta hua chhoDa tha nasheman

main kunj-e-qafas mein hun meri ruh wahin hai

ahbab mere mujh se ye kyon puchh rahe hain

ab rasm-e-wafa sare zamane mein kahin hai

shikwa na shikayat hai koi ahl-e-sitam se

'manzil' mein nahin hai to yahi chiz nahin hai