jo Dar apnon se hai ghairon se wo Dar ho nahin sakta

jo Dar apnoñ se hai ġhairoñ se vo Dar ho nahīñ saktā

ye vo ḳhanjar hai jo siine se bāhar ho nahīñ saktā

jo sach pūchho to ye tasvīr bhī hai sāneha jaisī

kisī bhī sānehe par koī shashdar ho nahīñ saktā

khaTaktī hai kisī shai kī kamī is dār-e-fānī meñ

shikasta bām-o-dar jis ke na hoñ ghar ho nahīñ saktā

ye āḳhir kyuuñ ki har din ek mausam ek hī manzar

jahāñ zer-o-zabar ho us se behtar ho nahīñ saktā

na shāmil ho jo āshufta-ḳhayālī zehn-e-mohkam meñ

vo kuchh bhī ho chaman-zār-e-muattar ho nahīñ saktā

kalī kā lab badan kundan kā qāmat sarv kī lekin

vafā nā-āshnā mere barābar ho nahīñ saktā

faqat sūrat meñ kyā rakkhā hai ai husn-e-tamāshā haiñ

ki kār-e-ā.ina se maiñ sikandar ho nahīñ saktā

kisī ko chāhne se baaz aanā kaise mumkin hai

likhā hai jo kitāboñ meñ vo aksar ho nahīñ saktā

tire inkār ko is zāviye se dekhtā huuñ maiñ

tirā milnā bhī me.ār-e-muqaddar ho nahīñ saktā

ye maanā aib bhī haiñ saikḌoñ kis meñ nahīñ hote

'amīn-ashraf' magar tujh sā qalandar ho nahīñ saktā

jo Dar apnon se hai ghairon se wo Dar ho nahin sakta

ye wo KHanjar hai jo sine se bahar ho nahin sakta

jo sach puchho to ye taswir bhi hai saneha jaisi

kisi bhi sanehe par koi shashdar ho nahin sakta

khaTakti hai kisi shai ki kami is dar-e-fani mein

shikasta baam-o-dar jis ke na hon ghar ho nahin sakta

ye aaKHir kyun ki har din ek mausam ek hi manzar

jahan zer-o-zabar ho us se behtar ho nahin sakta

na shamil ho jo aashufta-KHayali zehn-e-mohkam mein

wo kuchh bhi ho chaman-zar-e-muattar ho nahin sakta

kali ka lab badan kundan ka qamat sarw ki lekin

wafa na-ashna mere barabar ho nahin sakta

faqat surat mein kya rakkha hai ai husn-e-tamasha hain

ki kar-e-aina se main sikandar ho nahin sakta

kisi ko chahne se baz aana kaise mumkin hai

likha hai jo kitabon mein wo aksar ho nahin sakta

tere inkar ko is zawiye se dekhta hun main

tera milna bhi mear-e-muqaddar ho nahin sakta

ye mana aib bhi hain saikDon kis mein nahin hote

'amin-ashraf' magar tujh sa qalandar ho nahin sakta