jo dard mein rahat pa na sake ulfat ki haqiqat kya jaane

jo dard meñ rāhat pā na sake ulfat kī haqīqat kyā jaane

parvāna-sifat jo jal na sake sarshārī-e-ulfat kyā jaane

har-vaqt hai koī pesh-e-nazar yaksāñ hai kisī kī shām-o-sahar

mahrūmī-e-qurbat ke sadme nākām-e-mohabbat kyā jaane

shikva bhī kareñ to kis se kareñ ma.asūm-nazar ma.asūm-adā

jaise vo mohabbat kyā samjhe jaise vo adāvat kyā jaane

sar-chashma-e-ulfat ho kar bhī begāna-e-rāh-e-ulfat hai

kyoñ tāb-o-tavāñ ham kho baiThe vo chashm-e-ināyat kyā jaane

ummīd kī paiham ġham-ḳhvārī betābi meñ bhī sarshārī

kyā hijr meñ lazzat miltī hai āsūda-e-ulfat kyā jaane

jab dil meñ hujūm-e-yās huā do aañsū aañkh se bah nikle

jāñ-dāda-e-rāh-o-rasm-e-vafā dar-parda shikāyat kyā jaane

ai nāseh-e-mushfiq is ke sivā kyā tujh ko batā.eñ kyā hai maza

dekhī hī nahīñ jab us kī nazar to nashsha-e-ulfat kyā jaane

jo dard mein rahat pa na sake ulfat ki haqiqat kya jaane

parwana-sifat jo jal na sake sarshaari-e-ulfat kya jaane

har-waqt hai koi pesh-e-nazar yaksan hai kisi ki sham-o-sahar

mahrumi-e-qurbat ke sadme nakaam-e-mohabbat kya jaane

shikwa bhi karen to kis se karen masum-nazar masum-ada

jaise wo mohabbat kya samjhe jaise wo adawat kya jaane

sar-chashma-e-ulfat ho kar bhi begana-e-rah-e-ulfat hai

kyon tab-o-tawan hum kho baiThe wo chashm-e-inayat kya jaane

ummid ki paiham gham-KHwari betabi mein bhi sarshaari

kya hijr mein lazzat milti hai aasuda-e-ulfat kya jaane

jab dil mein hujum-e-yas hua do aansu aankh se bah nikle

jaan-dada-e-rah-o-rasm-e-wafa dar-parda shikayat kya jaane

ai naseh-e-mushfiq is ke siwa kya tujh ko bataen kya hai maza

dekhi hi nahin jab us ki nazar to nashsha-e-ulfat kya jaane