jo dekhta hun use munh pe bolta hun main

jo dekhtā huuñ use muñh pe boltā huuñ maiñ

isī sabab se to ahbāb meñ burā huuñ maiñ

tumheñ ye kis ne kahā tum ko yaad kartā huuñ

tumheñ to ek zamāne meñ ro chukā huuñ maiñ

ḳhafā ḳhafā maiñ jo rahtā huuñ in dinoñ sab se

ḳhafā kisī se nahīñ ḳhud se hī ḳhafā huuñ maiñ

tire baġhair to jiinā muhāl thā merā

tire baġhair magar dekh jī rahā huuñ maiñ

sukūn bāñTne vaalo tumheñ ḳhabar hī nahīñ

tumhāre saath aziyyat meñ mubtalā huuñ maiñ

ḳhalīfa hone kā dā'vā karūñgā kis muñh se

tamām 'azmat-o-tauqīr kho chukā huuñ maiñ

gavāh un ke vakīl un ke haiñ 'adālat bhī

kise batā.uñgā āḳhir ki be-ḳhatā huuñ maiñ

tum aaj 'nūr' bahut kuchh ho kuchh nahīñ the jab

mire 'azīz tumheñ tab se jāntā huuñ maiñ

jo dekhta hun use munh pe bolta hun main

isi sabab se to ahbab mein bura hun main

tumhein ye kis ne kaha tum ko yaad karta hun

tumhein to ek zamane mein ro chuka hun main

KHafa KHafa main jo rahta hun in dinon sab se

KHafa kisi se nahin KHud se hi KHafa hun main

tere baghair to jina muhaal tha mera

tere baghair magar dekh ji raha hun main

sukun banTne walo tumhein KHabar hi nahin

tumhaare sath aziyyat mein mubtala hun main

KHalifa hone ka da'wa karunga kis munh se

tamam 'azmat-o-tauqir kho chuka hun main

gawah un ke wakil un ke hain 'adalat bhi

kise bataunga aaKHir ki be-KHata hun main

tum aaj 'nur' bahut kuchh ho kuchh nahin the jab

mere 'aziz tumhein tab se jaanta hun main