jo dekhte hue naqsh-e-qadam gae honge

jo dekhte hue naqsh-e-qadam ga.e hoñge

pahuñch ke vo kisī manzil pe tham ga.e hoñge

palaT ke dasht se ā.eñge phir na dīvāne

pukār lo ki abhī kuchh qadam ga.e hoñge

jo māvarā-e-tasavvur nahīñ koī sūrat

to but-kade hī tak ahl-e-haram ga.e hoñge

tire junūñ ne pukārā thā hosh vāloñ ko

na jaane kaun se 'ālam meñ ham ga.e hoñge

mileñgī manzil-e-āḳhir ke baa'd bhī rāheñ

mire qadam ke bhī aage qadam ga.e hoñge

na pūchh hausala-e-hamrahān-e-sahl-pasand

jahāñ thakan ne kahā hogā tham ga.e hoñge

jo kah rahe haiñ ki aa.ī nazar na manzil-e-dost

vo log jānib-e-dair-o-haram ga.e hoñge

kahāñ se aa.e diyār-e-shafaq meñ rañgīnī

idhar se tere shahīdān-e-ġham ga.e hoñge

'shamīm' himmat-e-pā-e-talab kī baat na pūchh

vahāñ gayā huuñ jahāñ log kam ga.e hoñge

jo dekhte hue naqsh-e-qadam gae honge

pahunch ke wo kisi manzil pe tham gae honge

palaT ke dasht se aaenge phir na diwane

pukar lo ki abhi kuchh qadam gae honge

jo mawara-e-tasawwur nahin koi surat

to but-kade hi tak ahl-e-haram gae honge

tere junun ne pukara tha hosh walon ko

na jaane kaun se 'alam mein hum gae honge

milengi manzil-e-aKHir ke ba'd bhi rahen

mere qadam ke bhi aage qadam gae honge

na puchh hausala-e-hamrahan-e-sahl-pasand

jahan thakan ne kaha hoga tham gae honge

jo kah rahe hain ki aai nazar na manzil-e-dost

wo log jaanib-e-dair-o-haram gae honge

kahan se aae diyar-e-shafaq mein rangini

idhar se tere shahidan-e-gham gae honge

'shamim' himmat-e-pa-e-talab ki baat na puchh

wahan gaya hun jahan log kam gae honge