jo dil ki rah mohabbat mein yawari ho jae

jo dil kī raah mohabbat meñ yāvarī ho jaa.e

janāb-e-ḳhizr kī ma.alūm rahbarī ho jaa.e

udhar jo zulfoñ se mauqūf dilbarī ho jaa.e

idhar balā se musībat se dil barī ho jaa.e

mirī zabān jo vaqf-e-fusūñ-garī ho jaa.e

to band shīsha-e-dil meñ har ik parī ho jaa.e

musībatoñ se mirā dil agar barī ho jaa.e

to us ke saath hī merī bhī behtarī ho jaa.e

raqam jo vasf-e-ruḳh-e-raushan ai parī ho jaa.e

kalām apnā bhī dīvān-e-anvarī ho jaa.e

agar ḳhafā tū raqīboñ se ai parī ho jaa.e

to un ke hosh uḌeñ aur abtarī ho jaa.e

idhar bhī tirchhī nazar se to dekh ai zālim

idhar bhī koī adā-e-sitamgarī ho jaa.e

vo bahr-e-husn agar āb-e-lutf se sīñche

to kisht-e-ārzū phūle phale harī ho jaa.e

hamāre dil meñ jab aa.e vo ā.ina-paikar

hamārī aarzū sadd-e-sikandarī ho jaa.e

maiñ saḳht-jāñ huuñ na kar qatl mujh ko ai qātil

ki baaḌh teġh kī terī na dardarī ho jaa.e

gayā maiñ is liye le kar payām-e-vasl-e-adū

ki un kī diid kā baa.is payambarī ho jaa.e

vo mehr-e-husn jo aa jaa.e baam par apne

to zarra zarra bhī ḳhurshīd-e-ḳhāvarī ho jaa.e

ḳhudā ke vāste dekho na dekho ā.īna

koī zarūr hai is meñ na hamsarī ho jaa.e

kabhī maiñ dasht se bāhar qadam nahīñ rakkhūñ

junūñ ke hāthoñ agar pairahan zarī ho jaa.e

chaman ko naaz urūsān-e-bāġh par hai bahut

ḳhudā kare kahīñ us gul se hamsarī ho jaa.e

rahe har ek se 'sābir' judā mazāq-e-suḳhan

suḳhan-varoñ se nirālī suḳhanvarī ho jaa.e

jo dil ki rah mohabbat mein yawari ho jae

janab-e-KHizr ki malum rahbari ho jae

udhar jo zulfon se mauquf dilbari ho jae

idhar bala se musibat se dil bari ho jae

meri zaban jo waqf-e-fusun-gari ho jae

to band shisha-e-dil mein har ek pari ho jae

musibaton se mera dil agar bari ho jae

to us ke sath hi meri bhi behtari ho jae

raqam jo wasf-e-ruKH-e-raushan ai pari ho jae

kalam apna bhi diwan-e-anwari ho jae

agar KHafa tu raqibon se ai pari ho jae

to un ke hosh uDen aur abtari ho jae

idhar bhi tirchhi nazar se to dekh ai zalim

idhar bhi koi ada-e-sitamgari ho jae

wo bahr-e-husn agar aab-e-lutf se sinche

to kisht-e-arzu phule phale hari ho jae

hamare dil mein jab aae wo aaina-paikar

hamari aarzu sadd-e-sikandari ho jae

main saKHt-jaan hun na kar qatl mujh ko ai qatil

ki baDh tegh ki teri na dardari ho jae

gaya main is liye le kar payam-e-wasl-e-adu

ki un ki did ka bais payambari ho jae

wo mehr-e-husn jo aa jae baam par apne

to zarra zarra bhi KHurshid-e-KHawari ho jae

KHuda ke waste dekho na dekho aaina

koi zarur hai is mein na hamsari ho jae

kabhi main dasht se bahar qadam nahin rakkhun

junun ke hathon agar pairahan zari ho jae

chaman ko naz urusan-e-bagh par hai bahut

KHuda kare kahin us gul se hamsari ho jae

rahe har ek se 'sabir' juda mazaq-e-suKHan

suKHan-waron se nirali suKHanwari ho jae