jo dil ko dije to dil mein KHush ho kare hai kis kis tarah se halchal

jo dil ko diije to dil meñ ḳhush ho kare hai kis kis tarah se halchal

agar na diije to vo haiñ kyā kyā jatāve ḳhafagī itaab akaḌ bal

agar ye kahiye ki ham haiñ bekal zarā gale mil to hañs ke zālim

dikhāve haikal uThā ke ya.anī balā se merī mujhe to hai kal

jo is bahāne se haath pakḌeñ ki dekh dil kī dhaḌak hamāre

to haath chhap se chhuḌā le kah kar mujhe nahīñ hai kuchh is kī aTkal

jo chhup ke dekheñ to taaḌ jaave vagar sarīhan to dekho phirtī

ki aate aate nigāh ruḳh tak chhupā le muñh ko ulaT ke āñchal

kare jo va.ada to is tarah kā ki dil ko sunte hī ho tasallī

jo sochiye phir to kaisā va.ada faqat bahāna fareb aur chhal

jo dil ko bose ke badle diije to hañs ke lailā bahut ḳhushī se

jo bosa māñgo to phir ye naqshā kabhī to aaj aur kabhī kahe kal

na jul meñ aave na bhiḌ ke nikle na paas baiThe 'nazīr' ik dam

baḌā hī pur-fan baḌā hī syānā baḌā hī shoḳh aur baḌā hī chanchal

jo dil ko dije to dil mein KHush ho kare hai kis kis tarah se halchal

agar na dije to wo hain kya kya jatawe KHafagi itab akaD bal

agar ye kahiye ki hum hain bekal zara gale mil to hans ke zalim

dikhawe haikal uTha ke yani bala se meri mujhe to hai kal

jo is bahane se hath pakDen ki dekh dil ki dhaDak hamare

to hath chhap se chhuDa le kah kar mujhe nahin hai kuchh is ki aTkal

jo chhup ke dekhen to taD jawe wagar sarihan to dekho phirti

ki aate aate nigah ruKH tak chhupa le munh ko ulaT ke aanchal

kare jo wada to is tarah ka ki dil ko sunte hi ho tasalli

jo sochiye phir to kaisa wada faqat bahana fareb aur chhal

jo dil ko bose ke badle dije to hans ke laila bahut KHushi se

jo bosa mango to phir ye naqsha kabhi to aaj aur kabhi kahe kal

na jul mein aawe na bhiD ke nikle na pas baiThe 'nazir' ek dam

baDa hi pur-fan baDa hi syana baDa hi shoKH aur baDa hi chanchal