jo dil pe guzarti hai duniya use kya jaane

jo dil pe guzartī hai duniyā use kyā jaane

is raaz ko maiñ jānūñ yā merā ḳhudā jaane

jo tere ishāre ko paiġhām-e-qazā jaane

vo tiir ko kyā jaane shamshīr ko kyā jaane

kyā tujh ko sunā.ūñ maiñ afsāna-e-dard-e-dil

tū dard ko kyā samjhe tū dard ko kyā jaane

thī dil se ġharaz us ko dil chhīn liyā us ne

ab ro.uuñ ki taḌpūñ maiñ zālim kī balā jaane

'nudrat' ko to duniyā hī achchhī nazar aatī hai

jo ḳhud ho burā sab se vo kis ko burā jaane

jo dil pe guzarti hai duniya use kya jaane

is raaz ko main jaanun ya mera KHuda jaane

jo tere ishaare ko paigham-e-qaza jaane

wo tir ko kya jaane shamshir ko kya jaane

kya tujh ko sunaun main afsana-e-dard-e-dil

tu dard ko kya samjhe tu dard ko kya jaane

thi dil se gharaz us ko dil chhin liya us ne

ab roun ki taDpun main zalim ki bala jaane

'nudrat' ko to duniya hi achchhi nazar aati hai

jo KHud ho bura sab se wo kis ko bura jaane