jo dil pe guzarti hai wo samjha nahin sakte

jo dil pe guzartī hai vo samjhā nahīñ sakte

ham dekhne vāloñ ko nazar aa nahīñ sakte

be-qaid-o-rusūm aa.ī haiñ gulshan meñ bahāreñ

ab haath garebāñ kī taraf jā nahīñ sakte

rañgīnī-e-mustaqbil-e-raushan hai nazar meñ

ham talḳhi-e-māhaul se ghabrā nahīñ sakte

maġhrūr na ho fazl-e-ḳhizāñ aa ke chaman meñ

aise bhī haiñ kuchh phuul jo murjhā nahīñ sakte

maanā vo mujhe apnī nigāhoñ se girā deñ

lekin mire ehsās ko Thukrā nahīñ sakte

arbāb-e-ḳhirad laakh subuk-gām hoñ lekin

be-faiz-e-junūñ rāh-e-talab pā nahīñ sakte

maanā ki tire lutf-o-karam ḳhvāb haiñ lekin

har shaḳhs ko ye ḳhvāb nazar aa nahīñ sakte

tafsīr-e-do-ālam hai 'shakīl' apnā taġhazzul

maidān-e-ġhazal chhoḌ ke ham jā nahīñ sakte

jo dil pe guzarti hai wo samjha nahin sakte

hum dekhne walon ko nazar aa nahin sakte

be-qaid-o-rusum aai hain gulshan mein bahaaren

ab hath gareban ki taraf ja nahin sakte

rangini-e-mustaqbil-e-raushan hai nazar mein

hum talKHi-e-mahaul se ghabra nahin sakte

maghrur na ho fazl-e-KHizan aa ke chaman mein

aise bhi hain kuchh phul jo murjha nahin sakte

mana wo mujhe apni nigahon se gira den

lekin mere ehsas ko Thukra nahin sakte

arbab-e-KHirad lakh subuk-gam hon lekin

be-faiz-e-junun rah-e-talab pa nahin sakte

mana ki tere lutf-o-karam KHwab hain lekin

har shaKHs ko ye KHwab nazar aa nahin sakte

tafsir-e-do-alam hai 'shakil' apna taghazzul

maidan-e-ghazal chhoD ke hum ja nahin sakte