jo dil pe tir tumhaari ada ke baiThe hain

jo dil pe tiir tumhārī adā ke baiThe haiñ

vo goyā ban ke farishte qazā ke baiThe haiñ

jo mai-kade meñ ye mai-ḳhvār aa ke baiThe haiñ

na be-ġharaz ke na be-mudda.ā ke baiThe haiñ

sanam-kade hue ma.amūr haq-parastoñ se

butoñ kī yaad meñ bande ḳhudā ke baiThe haiñ

ye sochte haiñ ki haath aa.e koī tarz-e-sitam

hamārī fikr meñ vo sar jhukā ke baiThe haiñ

jahāñ meñ jalva-faroshī hai aap ko manzūr

isī liye to sar-e-bām aa ke baiThe haiñ

yahī to tālib-e-dīdār kī tamannā thī

naqāb aap jo ruḳh se uThā ke baiThe haiñ

lagī na kam ho pas-e-marg bhī ye matlab hai

vo sham.a merī lahad par jalā ke baiThe haiñ

ham apne aap ko ai charḳh misl-e-naqsh-e-qadam

kisī kī rāh-e-talab meñ miTā ke baiThe haiñ

firāq-e-yār meñ kuchh aisī nā-umīdī hai

ki apnī ziist se ham haath uThā ke baiThe haiñ

hamārā un kā usī din to faisla hogā

ham intizār meñ roz-e-jazā ke baiThe haiñ

janāb-e-shaiḳh bhī hañgām-e-mai-kashī 'hāmid'

adab se mahfil-e-rindāñ meñ aa ke baiThe haiñ

jo dil pe tir tumhaari ada ke baiThe hain

wo goya ban ke farishte qaza ke baiThe hain

jo mai-kade mein ye mai-KHwar aa ke baiThe hain

na be-gharaz ke na be-muddaa ke baiThe hain

sanam-kade hue mamur haq-paraston se

buton ki yaad mein bande KHuda ke baiThe hain

ye sochte hain ki hath aae koi tarz-e-sitam

hamari fikr mein wo sar jhuka ke baiThe hain

jahan mein jalwa-faroshi hai aap ko manzur

isi liye to sar-e-baam aa ke baiThe hain

yahi to talib-e-didar ki tamanna thi

naqab aap jo ruKH se uTha ke baiThe hain

lagi na kam ho pas-e-marg bhi ye matlab hai

wo shama meri lahad par jala ke baiThe hain

hum apne aap ko ai charKH misl-e-naqsh-e-qadam

kisi ki rah-e-talab mein miTa ke baiThe hain

firaq-e-yar mein kuchh aisi na-umidi hai

ki apni zist se hum hath uTha ke baiThe hain

hamara un ka usi din to faisla hoga

hum intizar mein roz-e-jaza ke baiThe hain

janab-e-shaiKH bhi hangam-e-mai-kashi 'hamid'

adab se mahfil-e-rindan mein aa ke baiThe hain