jo dilbar ki mohabbat dil se badle

jo dilbar kī mohabbat dil se badle

to luuñ ummīd-e-lā-hāsil se badle

muhāl-e-aql koī shai nahīñ hai

jo āsānī mirī mushkil se badle

jahāñ hai kor aur ḳhurshīd mahjūb

kahāñ tak sham.a har mahfil se badle

tahī-dast-e-mohabbat to bhī samjho

jo jam-sāġhar ko jām-e-gil se badle

har ik ko jaan dene kī ḳhushī ho

ajal gar nāvak-e-qātil se badle

agar ho chīñ-jabīñ qātil dam-e-qatl

qayāmat qāmat-e-qātil se badle

abhī ham to adū se bhī badal leñ

jo ġham ko ġham se dil ko dil se badle

khule ahvāl-e-dil jab nāsehoñ par

tah-e-dariyā agar sāhil se badle

shabistāñ chhoḌ kar lailā ho majnūñ

mirī āġhosh gar mahmil se badle

na jumbish ik qadam ho āsmāñ se

mirī manzil agar manzil se badle

butoñ kā jalva ka.abe meñ dikhā deñ

zarā taqvā dil-e-mā.il se badle

'qalaq' us zulm kā phir kyā Thikānā

agar maqtūl le qātil se badle

jo dilbar ki mohabbat dil se badle

to lun ummid-e-la-hasil se badle

muhaal-e-aql koi shai nahin hai

jo aasani meri mushkil se badle

jahan hai kor aur KHurshid mahjub

kahan tak shama har mahfil se badle

tahi-dast-e-mohabbat to bhi samjho

jo jam-saghar ko jam-e-gil se badle

har ek ko jaan dene ki KHushi ho

ajal gar nawak-e-qatil se badle

agar ho chin-jabin qatil dam-e-qatl

qayamat qamat-e-qatil se badle

abhi hum to adu se bhi badal len

jo gham ko gham se dil ko dil se badle

khule ahwal-e-dil jab nasehon par

tah-e-dariya agar sahil se badle

shabistan chhoD kar laila ho majnun

meri aaghosh gar mahmil se badle

na jumbish ek qadam ho aasman se

meri manzil agar manzil se badle

buton ka jalwa kabe mein dikha den

zara taqwa dil-e-mail se badle

'qalaq' us zulm ka phir kya Thikana

agar maqtul le qatil se badle