jo dushman hai use yun bhi saza hum log dete hain

jo dushman hai use yuuñ bhī sazā ham log dete haiñ

vo jab jab zaḳhm detā hai du'ā ham log dete haiñ

hamārī raah meñ kāñTe bichhānā jis kā sheva hai

vo miltā hai to phūloñ kī qabā ham log dete haiñ

hamārī raah kāñToñ se bharī hai soch kar aao

zamāne ko badalne kī sadā ham log dete haiñ

khilā de ek din aa kar ye murjhā.e hue chehre

tujhe āvāz ai bād-e-sabā ham log dete haiñ

yuuñ hī aatī nahīñ maqtal meñ pas-manzar kī tābānī

lahū se apne har manzar khilā ham log dete haiñ

hamāre ḳhuun ko itnā bhī arzāñ mat samajh duniyā

tire hāthoñ pe ye rang-e-hinā ham log dete haiñ

in āñkhoñ meñ agar thoḌī sī bhī bīnā.ī baaqī ho

to apnī shakl dekho aa.ina ham log dete haiñ

'na'īm' apne lahū kī chīḳh suntā hī nahīñ koī

na jaane kis bayābāñ meñ sadā ham log dete hiiñ

jo dushman hai use yun bhi saza hum log dete hain

wo jab jab zaKHm deta hai du'a hum log dete hain

hamari rah mein kanTe bichhana jis ka shewa hai

wo milta hai to phulon ki qaba hum log dete hain

hamari rah kanTon se bhari hai soch kar aao

zamane ko badalne ki sada hum log dete hain

khila de ek din aa kar ye murjhae hue chehre

tujhe aawaz ai baad-e-saba hum log dete hain

yun hi aati nahin maqtal mein pas-manzar ki tabani

lahu se apne har manzar khila hum log dete hain

hamare KHun ko itna bhi arzan mat samajh duniya

tere hathon pe ye rang-e-hina hum log dete hain

in aankhon mein agar thoDi si bhi binai baqi ho

to apni shakl dekho aaina hum log dete hain

'na'im' apne lahu ki chiKH sunta hi nahin koi

na jaane kis bayaban mein sada hum log dete hin