jo dusron ke ishaaron pe chalte rahte hain

jo dūsroñ ke ishāroñ pe chalte rahte haiñ

vo 'umr bhar kaf-e-afsos malte rahte haiñ

jo tund-o-tez havāoñ meñ jalte rahte haiñ

vahī charāġh añdheroñ ko khalte rahte haiñ

ye jāntā huuñ mirī dastaras meñ kuchh bhī nahīñ

magar vo ḳhvāb jo āñkhoñ meñ palte rahte haiñ

tum apnī chhat pe sar-e-shām yuuñ na aaya karo

tamām raat sitāre machalte rahte haiñ

kisī kī āñkhoñ meñ hotī hai zindagī kī chamak

kisī kī aañkh se chashme ubalte rahte haiñ

ḳhayāl karte nahīñ ham kabhī masāfat kā

husūl-e-manzil-e-maqsad meñ chalte rahte haiñ

laboñ pe apne tabassum to maiñ sajā lūñgā

magar jo āñkhoñ se aañsū nikalte rahte haiñ

zarā batāo to kis kis ko maat doge 'shakīl'

bisāt-e-vaqt pe mohre badalte rahte haiñ

jo dusron ke ishaaron pe chalte rahte hain

wo 'umr bhar kaf-e-afsos malte rahte hain

jo tund-o-tez hawaon mein jalte rahte hain

wahi charagh andheron ko khalte rahte hain

ye jaanta hun meri dastaras mein kuchh bhi nahin

magar wo KHwab jo aankhon mein palte rahte hain

tum apni chhat pe sar-e-sham yun na aaya karo

tamam raat sitare machalte rahte hain

kisi ki aankhon mein hoti hai zindagi ki chamak

kisi ki aankh se chashme ubalte rahte hain

KHayal karte nahin hum kabhi masafat ka

husul-e-manzil-e-maqsad mein chalte rahte hain

labon pe apne tabassum to main saja lunga

magar jo aankhon se aansu nikalte rahte hain

zara batao to kis kis ko mat doge 'shakil'

bisat-e-waqt pe mohre badalte rahte hain