jo gham ke shoalon se bujh gae the hum un ke daghon ka haar lae

jo ġham ke sho.aloñ se bujh ga.e the ham un ke dāġhoñ kā haar laa.e

kisī ke ghar se diyā uThāyā kisī ke dāman kā taar laa.e

ye kohsāroñ kī tarbiyat hai ki apnā ḳhema jamā huā hai

hazār tūfāñ sināñ chalā.e hazār fauj-e-ġhubār laa.e

kise batā.eñ ki ġham ke sahrā ko ḳhuld-dānish banāyā kaise

kahāñ se āb-e-ravāñ ko moḌā kahāñ se bād-e-bahār laa.e

har ek rāh-e-junūñ se guzre har ek manzil se kuchh uThāyā

kahīñ se dāman meñ ġham sameTā kahīñ se jholī meñ pyaar laa.e

ḳhalā ke māthe pe ek biñdī na jaane kab se chamak rahī thī

use bhī farq-e-zamīñ kī ḳhātir havā meñ uḌ kar utaar laa.e

jo apnī duniyā basā chukā hai use bhī mushkil kā sāmnā hai

kahāñ se shams-o-qamar ugaa.e kahāñ se lail-o-nahār laa.e

vahī shabāhat vahī adā.eñ magar vo lagtā hai ġhair jaisā

'na.īm' yādoñ kī anjuman meñ na jaane kis ko pukār laa.e

jo gham ke shoalon se bujh gae the hum un ke daghon ka haar lae

kisi ke ghar se diya uThaya kisi ke daman ka tar lae

ye kohsaron ki tarbiyat hai ki apna KHema jama hua hai

hazar tufan sinan chalae hazar fauj-e-ghubar lae

kise bataen ki gham ke sahra ko KHuld-danish banaya kaise

kahan se aab-e-rawan ko moDa kahan se baad-e-bahaar lae

har ek rah-e-junun se guzre har ek manzil se kuchh uThaya

kahin se daman mein gham sameTa kahin se jholi mein pyar lae

KHala ke mathe pe ek bindi na jaane kab se chamak rahi thi

use bhi farq-e-zamin ki KHatir hawa mein uD kar utar lae

jo apni duniya basa chuka hai use bhi mushkil ka samna hai

kahan se shams-o-qamar ugae kahan se lail-o-nahaar lae

wahi shabahat wahi adaen magar wo lagta hai ghair jaisa

'naim' yaadon ki anjuman mein na jaane kis ko pukar lae