jo gham-nasib hain kyon wo KHushi se milte hain

jo ġham-nasīb haiñ kyoñ vo ḳhushī se milte haiñ

añdhere dekhiye kab raushnī se milte haiñ

junūn-e-shauq ko sahrā-navard paayā hai

kuchh us ke rishte bhī āvārgī se milte haiñ

ḳhulūs bhī koī banjar zamīn hai shāyad

subūt is ke mirī zindagī se milte haiñ

vo baat kah dī jise aql-o-dil qubūl kareñ

ye dushmanī hai to ham dushmanī se milte haiñ

maqām hote haiñ dil ke qarīb bhī lekin

ġhurūr se nahīñ vo ājizī se milte haiñ

pasand ḳhātir-e-ahbāb hoñ na hoñ lekin

vo log bhī haiñ jo sāda-dilī se milte haiñ

amiir logoñ ko aish-o-nishāt ke sāmāñ

ġharīb logoñ kī fāqa-kashī se milte haiñ

ḳhud apne aap se aksar mile haiñ yuuñ bhī 'rafī.a'

ki jaise log kisī ajnabī se milte hiiñ

jo gham-nasib hain kyon wo KHushi se milte hain

andhere dekhiye kab raushni se milte hain

junun-e-shauq ko sahra-naward paya hai

kuchh us ke rishte bhi aawargi se milte hain

KHulus bhi koi banjar zamin hai shayad

subut is ke meri zindagi se milte hain

wo baat kah di jise aql-o-dil qubul karen

ye dushmani hai to hum dushmani se milte hain

maqam hote hain dil ke qarib bhi lekin

ghurur se nahin wo aajizi se milte hain

pasand KHatir-e-ahbab hon na hon lekin

wo log bhi hain jo sada-dili se milte hain

amir logon ko aish-o-nishat ke saman

gharib logon ki faqa-kashi se milte hain

KHud apne aap se aksar mile hain yun bhi 'rafia'

ki jaise log kisi ajnabi se milte hin