jo guzre hai bar aashiq-e-kaamil nahin malum

jo guzre hai bar āshiq-e-kāmil nahīñ ma.alūm

jibrīl hai har aan meñ nāzil nahīñ ma.alūm

kyā parda-e-ġhaflat hai kuchh ai dil nahīñ ma.alūm

rahtā hai shab-o-roz vo nāzil nahīñ ma.alūm

har dam yahī rahtā hai yahāñ dil meñ pas-o-pesh

jiine kā ba-juz-marg kuchh hāsil nahīñ ma.alūm

ruḳh dekh ke hairāñ huuñ tirā juuñ gul-e-ḳhurshīd

chhuT tere mujhe koī muqābil nahīñ ma.alūm

baḳhshish ye jo rakhtā hai ba-kaf bahr hai kashtī

kyā jāniye ye kis se hai saa.il nahīñ ma.alūm

be-thāh ho kyā bahr-e-haqīqat kā shanāvar

jis kā kahīñ āḳhir lab-e-sāhil nahīñ ma.alūm

kyuuñ rahte haiñ nit revḌī ke phere meñ āshiq

us ke lab-e-shīrīñ pe kahīñ til nahīñ ma.alūm

jarrāh ye kahtā hai mujhe dekh ke be-dam

kis teġh-e-nigah kā hai ye ghā.el nahīñ ma.alūm

juuñ ā.īna hairat-zada yaañ dekhūñ huuñ sab ko

kyā jāniye kis par huuñ maiñ maa.il nahīñ ma.alūm

chal chal ke rah-e-ishq meñ juuñ naqsh-e-qadam ham

thak baiThe 'nasīr' ab hameñ manzil nahīñ ma.alūm

jo guzre hai bar aashiq-e-kaamil nahin malum

jibril hai har aan mein nazil nahin malum

kya parda-e-ghaflat hai kuchh ai dil nahin malum

rahta hai shab-o-roz wo nazil nahin malum

har dam yahi rahta hai yahan dil mein pas-o-pesh

jine ka ba-juz-marg kuchh hasil nahin malum

ruKH dekh ke hairan hun tera jun gul-e-KHurshid

chhuT tere mujhe koi muqabil nahin malum

baKHshish ye jo rakhta hai ba-kaf bahr hai kashti

kya jaaniye ye kis se hai sail nahin malum

be-thah ho kya bahr-e-haqiqat ka shanawar

jis ka kahin aaKHir lab-e-sahil nahin malum

kyun rahte hain nit rewDi ke phere mein aashiq

us ke lab-e-shirin pe kahin til nahin malum

jarrah ye kahta hai mujhe dekh ke be-dam

kis tegh-e-nigah ka hai ye ghael nahin malum

jun aaina hairat-zada yan dekhun hun sab ko

kya jaaniye kis par hun main mail nahin malum

chal chal ke rah-e-ishq mein jun naqsh-e-qadam hum

thak baiThe 'nasir' ab hamein manzil nahin malum