jo hawa hai surat-e-baad-e-muKhaalif tez hai

jo havā hai sūrat-e-bād-e-muḳhālif tez hai

dil kā maidāñ hai ki ik sahrā-e-āfat-ḳhez hai

mere saaqī dam-ba-dam kyūñkar bharā aa.e na dil

duur huuñ maiñ aur sāġhar bazm meñ labrez hai

dukh uThāne kī bhī āḳhir hotī hai kuchh intihā

bulbul-e-dil kā mire naġhma bhī dard-añgez hai

aamad aamad hai ḳhizāñ kī kyuuñ na ro.e andalīb

gul abhī nau-kār haiñ sabza abhī nau-ḳhez hai

tere vahshī jaate haiñ uftān-o-ḳhezāñ sū-e-dasht

ho junūñ dekhe se aisī chaal vahshat-ḳhez hai

kyuuñ na ro.eñ saikḌoñ tūfān uTThe chaah meñ

ham na vāqif the ki bahr-e-ishq tūfāñ-ḳhez hai

āb-e-ḳhanjar tū milā de to chhalak jaa.e abhī

umr kā sāġhar yahāñ ik umr se labrez hai

us pe martā huuñ mire marne kī hai jis ko ḳhushī

āriza vo hai ki jis se maut ko parhez hai

tuḳhm ulfat kā zamīn-e-dil meñ bonā kyā zarūr

log kahte haiñ ki ye to ḳhud mohabbat-ḳhez hai

ho jahāñ ma.ashūq vaañ āshiq bhī hotā hai zarūr

yaañ yuuñ hī roz-e-azal se husn-o-ishq aamez hai

naza.a meñ bhī mātam-e-dil hai talāsh-e-yār hai

paañv haiñ chālāk ab tak haath ab tak tez hai

kis takalluf se nibāhī maiñ ne ulfat aap kī

faḳhr kartā huuñ ki merā ishq husn-āmez hai

kaaT ke sar merā tum ne haath meñ laTkā diyā

dekho ye merī vafādārī kī dastāvez hai

kar diyā hai mast saare ḳhuftagān-e-ḳhāk ko

kyā huā shahr-e-ḳhamoshāñ kī nashāt-añgez hai

hai 'rashīd' ab tak giyāh-e-lucknow mardum giyāh

kyā zamīñ hai jo ujaḌ jaane pe mardum-ḳhez hai

jo hawa hai surat-e-baad-e-muKHalif tez hai

dil ka maidan hai ki ek sahra-e-afat-KHez hai

mere saqi dam-ba-dam kyunkar bhara aae na dil

dur hun main aur saghar bazm mein labrez hai

dukh uThane ki bhi aaKHir hoti hai kuchh intiha

bulbul-e-dil ka mere naghma bhi dard-angez hai

aamad aamad hai KHizan ki kyun na roe andalib

gul abhi nau-kar hain sabza abhi nau-KHez hai

tere wahshi jate hain uftan-o-KHezan su-e-dasht

ho junun dekhe se aisi chaal wahshat-KHez hai

kyun na roen saikDon tufan uTThe chah mein

hum na waqif the ki bahr-e-ishq tufan-KHez hai

aab-e-KHanjar tu mila de to chhalak jae abhi

umr ka saghar yahan ek umr se labrez hai

us pe marta hun mere marne ki hai jis ko KHushi

aariza wo hai ki jis se maut ko parhez hai

tuKHm ulfat ka zamin-e-dil mein bona kya zarur

log kahte hain ki ye to KHud mohabbat-KHez hai

ho jahan mashuq wan aashiq bhi hota hai zarur

yan yun hi roz-e-azal se husn-o-ishq aamez hai

naza mein bhi matam-e-dil hai talash-e-yar hai

panw hain chaalak ab tak hath ab tak tez hai

kis takalluf se nibahi main ne ulfat aap ki

faKHr karta hun ki mera ishq husn-amez hai

kaT ke sar mera tum ne hath mein laTka diya

dekho ye meri wafadari ki dastawez hai

kar diya hai mast sare KHuftagan-e-KHak ko

kya hua shahr-e-KHamoshan ki nashat-angez hai

hai 'rashid' ab tak giyah-e-lucknow mardum giyah

kya zamin hai jo ujaD jaane pe mardum-KHez hai