jo ho chuka hai jo hona hai us ka sangam hai

jo ho chukā hai jo honā hai us kā sangam hai

abhī se aage muallaq hai pīchhe mubram hai

hamāre shahr ke har sach meñ jhuuT mudġham hai

yahāñ safed-o-siyah kī tamīz mub.ham hai

bas ek maiñ se azāzīl ho gayā iblīs

aur ik duā kī badaulat ḳhalīfa aadam hai

na hā-o-hū na koī chīḳh hai sar-e-maqtal

hamāre shahr meñ kaisā ye hū kā aalam hai

kisī ke shauq ne gangā kā ruup dhaar liyā

kisī ke ishq kā iz.hār āb-e-zamzam hai

kahāñ pe bhej diyā hai ye kaisī duniyā hai

ki zindagī to yahāñ ek jehd-e-paiham hai

jo haal pūchhne aa.e haiñ mere zaḳhmoñ kā

kisī ke haath namak hai kisī ke marham hai

ye kis ne soch kā is shab diyā jalāyā hai

fasīl-e-shahr pe ab raushnī kā parcham hai

ye kyā savāl uThāyā hai phir 'hidāyat' ne

faqīh-e-shahr kā phir se mizāj barham hai

jo ho chuka hai jo hona hai us ka sangam hai

abhi se aage muallaq hai pichhe mubram hai

hamare shahr ke har sach mein jhuT mudgham hai

yahan safed-o-siyah ki tamiz mubham hai

bas ek main se azazil ho gaya iblis

aur ek dua ki badaulat KHalifa aadam hai

na ha-o-hu na koi chiKH hai sar-e-maqtal

hamare shahr mein kaisa ye hu ka aalam hai

kisi ke shauq ne ganga ka rup dhaar liya

kisi ke ishq ka izhaar aab-e-zamzam hai

kahan pe bhej diya hai ye kaisi duniya hai

ki zindagi to yahan ek jehd-e-paiham hai

jo haal puchhne aae hain mere zaKHmon ka

kisi ke hath namak hai kisi ke marham hai

ye kis ne soch ka is shab diya jalaya hai

fasil-e-shahr pe ab raushni ka parcham hai

ye kya sawal uThaya hai phir 'hidayat' ne

faqih-e-shahr ka phir se mizaj barham hai