jo ho chuka hai lahu ab wo shir jagega

jo ho chukā hai lahū ab vo shiir jāgegā

vo zulm hai ki har ik kā zamīr jāgegā

bahut dinoñ meñ lī nafrat ne dil meñ añgḌā.ī

jo mahv-e-ḳhvāb hai tarkash kā tiir jāgegā

javān beTī ke hamrāh bhiik māñgtā hai

nigāh-e-bad jo paḌegī faqīr jāgegā

parā.e ḳhuun se itnā bhī pyaar kyā karnā

baḌhegī umr to is kā ḳhamīr jāgegā

chitā ke sho.aloñ ko rahne de sard hī varna

bhaḌak uThegā to murda sharīr jāgegā

ye kis savāl meñ uljhe hue haiñ farzāne

koī jagā.e to barr-e-saġhīr jāgegā

adab-navāz ke andar rahī jo bedārī

to ḳhānqāh-e-adab kā bhī piir jāgegā

ai mere dost lagā inqalāb kā na.ara

har ek ghar kā saġhīr-o-kabīr jāgegā

ḳhayāl-e-ḳhām hai shaitān varġhalātā hai

vo sotā kab hai ki rabb-e-qadīr jāgegā

tū apne lams ke jaadū pe e.atibār na kar

ise jhiñjhoḌ tab is kā sharīr jāgegā

rah-e-talab meñ na bhaTkegā koī bhī 'ahsan'

jo kārvāñ kī umīdoñ kā miir jāgegā

jo ho chuka hai lahu ab wo shir jagega

wo zulm hai ki har ek ka zamir jagega

bahut dinon mein li nafrat ne dil mein angDai

jo mahw-e-KHwab hai tarkash ka tir jagega

jawan beTi ke hamrah bhik mangta hai

nigah-e-bad jo paDegi faqir jagega

parae KHun se itna bhi pyar kya karna

baDhegi umr to is ka KHamir jagega

chita ke shoalon ko rahne de sard hi warna

bhaDak uThega to murda sharir jagega

ye kis sawal mein uljhe hue hain farzane

koi jagae to barr-e-saghir jagega

adab-nawaz ke andar rahi jo bedari

to KHanqah-e-adab ka bhi pir jagega

ai mere dost laga inqalab ka nara

har ek ghar ka saghir-o-kabir jagega

KHayal-e-KHam hai shaitan warghalata hai

wo sota kab hai ki rabb-e-qadir jagega

tu apne lams ke jadu pe eatibar na kar

ise jhinjhoD tab is ka sharir jagega

rah-e-talab mein na bhaTkega koi bhi 'ahsan'

jo karwan ki umidon ka mir jagega