jo hona tha hua shikwa gila kya

jo honā thā huā shikva gilā kyā

mohabbat meñ vafā kaisī jafā kyā

dil-e-māyūs ye āh-o-bukā kyā

shikasta saaz kī āḳhir sadā kyā

mire āġhosh meñ khele haiñ tūfāñ

maiñ mauj-e-bahr-e-ġham meñ Dūbtā kyā

jamāl-e-barq hai jin kī tajallī

nazar un se milā.ūñ maiñ bhalā kyā

na hushyāroñ na dīvānoñ meñ haiñ aap

vo farmāte haiñ mujh se aap kā kyā

tirā va.ada kahāñ tak saath degā

qayāmat se milegā silsila kyā

churā liiñ maiñ ne dānista nigāheñ

bharī mahfil meñ un ko dekhtā kyā

nigāh-e-nāz ke maare hue haiñ

hamāre sāmne āb-e-baqā kyā

dil-e-betāb aur tum se shikāyat

ye dīvāna hai is kī baat kā kyā

tumhīñ ne pher liiñ jab mujh se nazreñ

zamāna dil ko degā aasrā kyā

vo ḳhud chāheñ tujhe ye chāhtā hai

'vakīl'-e-be-adab terī sazā kyā

jo hona tha hua shikwa gila kya

mohabbat mein wafa kaisi jafa kya

dil-e-mayus ye aah-o-buka kya

shikasta saz ki aaKHir sada kya

mere aaghosh mein khele hain tufan

main mauj-e-bahr-e-gham mein Dubta kya

jamal-e-barq hai jin ki tajalli

nazar un se milaun main bhala kya

na hushyaron na diwanon mein hain aap

wo farmate hain mujh se aap ka kya

tera wada kahan tak sath dega

qayamat se milega silsila kya

chura lin main ne danista nigahen

bhari mahfil mein un ko dekhta kya

nigah-e-naz ke mare hue hain

hamare samne aab-e-baqa kya

dil-e-betab aur tum se shikayat

ye diwana hai is ki baat ka kya

tumhin ne pher lin jab mujh se nazren

zamana dil ko dega aasra kya

wo KHud chahen tujhe ye chahta hai

'wakil'-e-be-adab teri saza kya