jo iKHtilaf nahin hai to etiraf to ho

jo iḳhtilāf nahīñ hai to e'tirāf to ho

hai iḳhtilāf to kuchh vaj.h-e-iḳhtilāf to ho

diloñ meñ kyā hai kuchh is kā atā-patā to chale

ki baat jaisī ho jo bhī ho saaf saaf to ho

kuchh us se rabt-o-ta.alluq kā silsila to lage

nahīñ hai vo jo muāfiq na ho ḳhilāf to ho

nahīñ burā.ī miTāne kī gar hameñ taufīq

kam-az-kam us se tanaffur to inhirāf to ho

nahīñ sa.ādat-e-sajda agar muqaddar meñ

ḳhulūs se dar-e-ma.abūd kā tavāf to ho

vo ahl-e-naqd-o-basīrat haiñ ḳhair hoñge bhī

durust pahle magar un kā shīn-qāf to ho

na hoñ jo sher haqā.eq ke tarjumāñ 'rāhī'

haqīqatoñ kā magar un se inkishāf to ho

jo iKHtilaf nahin hai to e'tiraf to ho

hai iKHtilaf to kuchh wajh-e-iKHtilaf to ho

dilon mein kya hai kuchh is ka ata-pata to chale

ki baat jaisi ho jo bhi ho saf saf to ho

kuchh us se rabt-o-talluq ka silsila to lage

nahin hai wo jo muafiq na ho KHilaf to ho

nahin burai miTane ki gar hamein taufiq

kam-az-kam us se tanaffur to inhiraf to ho

nahin saadat-e-sajda agar muqaddar mein

KHulus se dar-e-mabud ka tawaf to ho

wo ahl-e-naqd-o-basirat hain KHair honge bhi

durust pahle magar un ka shin-qaf to ho

na hon jo sher haqaeq ke tarjuman 'rahi'

haqiqaton ka magar un se inkishaf to ho